CEBU, Philippines — Tinuod gyud ang panultihon nga “Music is life” kun diin ang musika mao ang mohatag pagbalik og kagana sa nagkawalay umoy nga kinabuhi.
“Namat-an ko lang nga ang music maoy mopadasig ug makahatag og kalipay nako”, mao kini ang gipabuhagay sa 26 anyos nga musikero nga nagikan sa isla sa Camotes nga si Kervin Kane.
Bata pa lang si Kervin, nakita na gyud niya nga aduna gyud siya’y dako nga pagmahal sa musika.
Grade 4 pa lang siya sa dihang nakakita siya og interes sa paggamit og gitara.
“Nakakita ko og mga kahibalo mo- guitar then nakakuha ko og interest then naa may guitar akong uncle nga hilig sab og music, nanghuwam ko ug mao akong gigamit pagpraktis”, matud pa niya.
Nakat-on siya sa pagbasa og chords pinaagi sa chord charts nga anaa sa luyo nga bahin sa song hits.
Gumikan kay determinado gyud siya nga makat-on, nagpatambag siya sa mga kahibalo mogitara kun unsa ang husto nga posisyon sa mga tudlo ug hangtud sa nakat-on gyud siya.
Gitug-an ni Kervin nga wala siya nagpaubos og music lesson tungod sa kakuwang sa kwarta apan naningkamot gihapon siya nga makat-on pa, mao nga aron kanunay siya nga mabansay-bansay, nahimamat niya ang labing una nga banda nga iya ra sab nga mga barkada.
Pinaagi sa musika, nakakita siya og mga higala nga matawag niya nga mao ang tulay aron nga mas maila-ila pa niya ang iyang kaugalingon .
Dako gyud og natabang ang musika sa kinabuhi ni Kervin gumikan kay nadiskubrehan sab niya ang iyang kaugalingon ug nakatabang kini aron nga mas maanindot ang dagan sa kinabuhi.
Nagtubo gyud sa isla si Kervin. Siya lang ang nag-inusara nga anak ug matud pa niya laay ang wala’y igsuon gumikan kay anaa kaniya ang tanang atensyon apan bintaha sab kini gumikan kay anaa kaniya ang suporta nga iyang makuha sa iyang ginikanan.
Suportado sa iyang ginikanan ang iyang pagkamusikero. Matud pa niya nga wala siya makadawat og yawyaw niini tungod kay gidungan niya ang iyang pagtuon ug ang iyang pagtukar.
Mosulod siya sa klase sa buntag ug inig human niini, modiretso na siya sa iyang gig nga anaa ra usab sa isla.
Giasoy ni Kervin nga nakalampos gyud niya ang iyang pagtuon sa kurso nga Bachelor of Science in Hospitality Management niadtong 2015 didto sa Cebu Technological University nga anaa ra sab sa isla.
Responsable si Kervin sa iyang mga buhat ug lakang sa kinabuhi aron sab nga mogaan ang pamati sa iyang ginikanan nga dili siya mahimong konsumisyon niini. Ang iyang pagkamusikero mao ang nakatabang sa pinansyal nga aspeto sa iyang ginikanan.
Matud pa niya nga gipaningkamutan niya nga maayo ang dagan sa iyang kinabuhi isip usa ka estudyante, isip usa ka musikero ug isip usa ka anak.
Gitabangan ni Kervin ang iyang inahan ug usa ka volunteer worker sa barangay ug ang iyang amahan nga nga dunay binuhi nga mga hayop sama sa manok ug baboy.
Simple lang ang kinabuhi ni Kervin sa probinsiya. Matud pa niya nga presko ug mas makahunahuna siya og tarong gumikan kay minus lang ang saba ikumpara sa siyudad.
Tungod sa kahamugaway sa iyang palibot, nakat-on siya og suwat og kanta sa dihang first year high school pa lang siya.
“With the help of Plan International, mao ni siya ang organization nga nagtabang sa mga kabataan. Naa silay songwriting workshop ug niapil ko. Nalipay ko kay nadawat akong gisuwat nga naapil sa ilang album”, saysay pa ni Kervin.
Ang maong awit nag-ulohan og ‘Hanggan Kailan’.
Nasundan ang maong awit ug karon, mapaminaw na kini sa nagkadaiyang istasyunan sa radyo sa Central Visayas.
Ang awit nga ‘Dili Pwede’ nalakip na sa Pinoy Top 10 Countdown sa 102.3 FM didto sa Bohol.
“Okay kaayo kay positive ang feedback sa song which is available na sab sa Youtube. Thankful kaayo ko sa mga ni-support sa akong kanta. Unexpected gyud bitaw nga maabot ni nako kay sauna dream ra gyud nako ug medyo struggle kaayo ang mag-produce og kanta tungod kay kuwang sa resources ug funds pero mapasalamaton kay ko kay naay mga tawo nga mitabang nako para mahitabo akong damgo,” panapos pa niya.
Kabahin siya karon sa banda nga ‘Kervin Kane and the Chicksticks’. Mao kini ang kasamtangang banda ni Kervin nga nagdala sa mga kanta gikan sa isla paingon dinhi sa siyudad.
Istorya pa ni Kervin nga ang iyang manager nga si Joseph Lanuza mao ang mihatag og dakong oportunidad nga mapalapdan pa ang iyang audience ug dili lang kutob sa isla ang iyang kanta.
“Nadiscover ko ni Kuya Joseph kay nakadungog siya sa akong kanta. Ingon siya nga sayang og sa isla ra kutob ang akong kanta mao nga naa mi karon diri sa Cebu aron ipadungog pa sa uban”, suma pa niya.
Adunay regular nga gig si Kervin kaniadto sa gipanag-iya nga restaurant ni Lanuza nga mao ang Portxide, Poro sa wala pa niya niahi sa dakbayan.
“Akong ganahan ra gyud mahitabo sa akong kinabuhi kay mopadungog sa akong music”, pulong pa niya.
Acoustic ang kanunay nga ginatukar ni Kervin. Gani, aduna na sab siya’y umaabot nga mga kanta nga ipadungog sa kadaghanan.
“I am a happy person ug akong mga kanta nagbase lang sa experience sa akong mga friends kay I really have a lot of friends mao na akong maobserbaran sa ilang mga na-experience sa life and naa puy uban nga makasuwat ko kay base pud sa akong na-experience”, pagpasabot pa niya.
Alang kang Kervin , ang musika ug ang Ginoo mao ang naghatag niya og kusog aron nga magpadayon sa dagan sa iyang kinabuhi bisan pa man og nakasinati siya og mga pagsuway nga dili gyud malikayan.
“Wala gyud ko kahinumdom nga ni-give up ko . Ang akong mindset is positive gyud ko bisan unsa ang circumstances in life. Kung naay struggles kay mapangitaan ra man sab gyud og paagi. Why give up when God is with us to lift us up? Ampo lang gyud ug maningkamot”, siya miingon.