CEBU, Philippines – Motikang og balik dinhi sa Pilipinas ang South Korean boy band nga DAY 6 karong November 23 alang sa laing hugna sa ilang concert.
Tipik kini sa ilang “Gravity” world tour nga sugdan sa Seoul karong August nga pagasundan sa nagkadaiyang dapit sa Australia, Europe ug Asia.
Kahinumdoman nga nakatikang na sa nasud ang Day 6 sa miaging tuig alang sa gitawag nila nga Youth Tour.
Naporma ang maong grupo niadtong 2015 ug kini maoy nagpasikat sa awit nga When You Love Someone, I’m Serious, You Were Beautiful, I Smile, Dance Dance ug uban pa.
Gilangkoban ang DAY 6 nila ni Jae, Sungjin, Young K, Wonpil, ug Dowoon.
Nagpanikad na ang fans
Nagsagunson na gyud ang pag-post ni John Lloyd Cruz og hulagway sa Facebook kun diin katupad niya ang kanhi niya ka-loveteam nga si Bea Alonzo.
Kahinumdoman nga nag-shoot sila si John Lloyd ug Bea sa wala pa matino nga proyekto didto sa Palawan.
Nagpanikad og samot ang ilang fans sa umaabot nila nga proyekto.
Taod-taod na nga nawala sa limelight si Lloydie sukad sila nagkauyab ni Ellen Adarna. Gusto sa aktor nga masuwayan ang normal nga kinabuhi kauban ang iyang hinigugma nga si Ellen.
Nadine ug Aga magpares sa pelikula
Gikatakdang magpares sa usa ka pelikula sa Viva Films sila si Nadine Lustre ug Aga Mulach.
Mao kini ang labing unang movie project ni Nadine kun diin duna sila’y layo nga age gap sa iyang kapares.
Katapusang pelikula ni Aga mao ang “First Love” sa miaging tuig kun diin kapares niya si Bea Alonzo.
Dili pa matino kun kanus-a masugdan ang maong movie project gumikan kay busy pa si Nadine sa promosyon sa pelikula niya nga Indak kauban si Sam Concepcion.
Glaiza mi-eskwela sa UK
Kasamtangang tua sa United Kingdom si Glaiza de Castro gumikan kay nagtungha siya og music production ug composition.
Matud pa niya nga taod-taod na ang maong plano gumikan kay gusto niya mapalapdan ang kaalam niya sa maong field.
Gawas sa iyang pag-eskwela , duna pud siya’y proyekto nga pagabuhaton sa maong dapit.
Adbokasiya ni Aida
Ang pagtabang sa iyang isigkatawo maoy usa sa mga hiyas sa kandidata sa Mrs. Philippines World 2019 nga giila nga “Yaya Ng Mga Artista” nga si Aida Patana .
Sa Europe pagahimoon ang maong indigay ug nagpanikad na siya og maayo niini. Nagtangag og adbokasiya si Aida busa gilusad niya sa miaging adlaw ang livelihood program niya nga gitawag og “Pangkabuhayan Showcase ni Aida” kun diin ubay-ubay nga kababaenhan ang nakabenepisyo niini.
Matud pa ni Aida nga bisan sa ginagmay nga negosyo, seguradong moasenso gyud basta ubanan lang gyud og pagkugi.
“Magkugi lang gyud ta sa pagpamaligya, bisan tubig pa na, maka-ginansya gyud ta ana. Dili ta mawad-an og paglaom, maningkamot gyud ta,” suma pa ni Aida atol sa paglusad g sa iyang livelihood program nga gipahigayon sa Cebu City Hall Social Hall.
Nakahatag og inspirasyon si Aida sa ubang kababaenhan nga naningkamot gyud aron moasenso bisan pa man sa mga naagian nga pagsulay.
Si Señorito Michel Lhuillier maoy mentor ni Aida sa natad sa pag-negosyo ug nihatag gyud kini og dakong suporta sa iyang livelihood program alang sa kababaenhan.
Nisuporta usab sa iyang adbokasiya sila si Cebu City Mayor Edgardo Labella, City Councilor Niña Mabatid, , Councilor Jackson Tudtud, Atty. Elaine Bathan, Miss Lilli An Du ug ang Kapamilya Star nga si Daniel Matsunaga. Si Aida maoy tag-iya sa M-Talents Events and Promotions nga maoy nag-una nga supplier og mga artista sa bisan unsa nga kalihokan sa Kabisay-an.
Bag-ong single sa Callalily
Malipayong gipahibalo sa bokalista sa bandang Callalily nga si Kean Cipriano nga gikatakda sila nga mo-release sa dili madugay sa ilang new single.
Ang paglusad niini iatol sa ilang 14th anniversary karong July 6.
Nag-ulohan ang maong awit og “Reserba” ug nagpanikad na niini ang fans sa maong banda.
Kauban ni Kean sa maong grupo sila si Aaron Ricafrente, Lemuel Belaro, ug Ken Tiongson.
Gipasikat kaniadto sa Callalily ang mga awit nga “Magbalik,” “Stars” ,”Pasan” ug “Sanctuary” .