Pasidungog kang manoy

CEBU, Philippines — Tungod sa dakong kontribusyon  ni Eddie Garcia sa movie industry sa nasud,nabanhaw ang mga sugyot nga angayan ituboy ang aktor isip National Artist for Cinema.

Padayon nga  nagbangotan ang showbiz world sa kamatayon sa beteranong aktor nga gitawag nila og “Manoy”.

Ang paghatag og pasidungog kang Eddie maoy usa sa iduso ni Quezon City District V House Representative Alfred Vargas sa pagsugod sa 18th Congress sunod buwan.

Buhi pa

Wala pa hingpit nga nanamilit ang karakter ni Barbie Forteza sa teleserye nga ‘Kara Mia’. Sa usa ka episode, gipatay ang karakter ni Barbie human nga naduslakan sa usa ka engkanto nga si Iswal. Apan dali lang kini nga nabuhi sa sunod nga episode. Matud pa ni Barbie nga makita gihapon siya hangtud sa katapusang bahin sa serye kun diin duha ka semana na lang ang nahibilin sa pag-ere niini.

maninghag sa katabang?

Gikataw-an ni Derek Ramsey ang komento gikan sa usa ka basher nga matud pa nga laos na siya. Nidugang ang basher og komento sa iyang post nga matud ginasinghagan ni Derek ang iyang mga katabang sa balay. Gihagit ni Derek ang maong basher ug mao kini ang direktang tubag ni Derek ngadto kaniya: “Really? Cursing people in my house??? You have to be very careful of what you are saying. I think I have an idea who you are! Look you can say whatever you want but posting my address is just wrong. I dare you to talk to my help here at home and ask them how I am.”

Sekreto ni Heart

Gibutyag ni Heart Evangelista ang iyang skin care secret aron nga magpabilin siya nga bata tan-awon. Matud pa niya nga maghayang siya nga matulog aron nga dili siya magka-wrinkles.

Gipanguyaban sa alahera

Daghan ang nabitik sa post ni Gladys Guevarra nga matud pa nga engagement ring na ang iyang gisul-ob. Sa iyang taas nga post, daghan ang nagtuo nga adunay nanguyab kaniya apan ang iyang alahera ra mismo ang nanguyab kaniya aron nga mopalit siya og alahas.

Profile picture ni Lloydie

Napuno sa mga nagkadaiyang reaksyon ang bag-o nga gi-upload ni John Lloyd Cruz nga hulagway nga gihulip niya sa iyang karaan nga profile picture. Daghan ang nalipay nga namonitor na sab pagbalik ang verified account sa aktor. Daghan sab nga nadismaya tungod sa pagtuo nga bag-o kining  kuha apan nasayran nga ang maong hulagway gikuha pa niadtong 2015 pa diay.

Jasmine ug Rocco sa Dots

Kumpirmado nga nalakip sila si Jasmine Curtis-Smith ug Rocco Nacino sa Philippine adaptation sa Korean hit series nga ‘Descendants of the Sun’. Nalakip usab si Dingdong Dantes sa maong proyekto.

Unang acting gig

Gikalipay pag-ayo sa kanhi PBB Otso  housemate nga si Aljon Mendoza gumikan kay nakadawat na siya og acting gig. Nahimo siya nga kabahin sa episode nga gipagawas kagahapon sa ‘Maalaala Mo Kaya’ kun diin nakauban niya sa unang higayon si Joshua Garcia.

Pun-an ang anak

Nanghinaot gihapon si Doug Kramer nga magsabak pa unta ang iyang asawa nga si Cheska Garcia. Unom ka tuig na ang milabay sa dihang ulahi kini nga nanganak sa ilang kinamanguhran nga si Gaven. Nanghinaot sab siya nga kun tugtan pa sila sa Ginoo nga magka-anak, unta usa pa kini  ka batang babaye.

Friends pa

“We’re still friends and we are still getting to know each other pa naman”, mao kini ang tubag ni Ria Atayde sa dihang gipangutana siya sa press kabahin nilang duha ni JM de Guzman. Taod-taod na nga gidungog nga dunay tinagoang relasyon ang duha..