CEBU, Philippines — Importante kaayo sa atong kinabuhi ang atong mga higala sanglit magsilbi nato sila nga ikaduha nga pamilya.
Busa ato gyud nga seguradoon nga maayo ang dagan sa atong relasyon sa atong mga higala.
Mobuhat gyud ta og mga butang nga maayo aron dili gyud kini maguba.
Magkutlo kita og pipila ka tips gikan sa www. inspiringtips.com aron magpabilin nga lig-on angpanaghigalaay .
Mao kini ang magsilbing instrumento aron matawag nga hangtod na sa kahangtoran ang inyong panaghigalaay.
Sa giingon pa ni William Shakespeare: “A friend is one that knows you as you are, understands where you have been, accepts what you have become, and still, gently allows you to grow.”
Tips:
• Pilia gyud ang mga tawo nga matawag nimo og tinud-anay nga higala. Gawas sa kalipay, ang maong mga tawo, makauban usab sa panahon sa kasub-anan.
• Sa imong pagkamaayo, makahatag ka na og positibo nga enerhiya ngadto sa imong mga higala.
• Kun tinud-anay mo sa usag-usa, mopasamot kini og kalig-on sa inyong panaghigalaay. Suma pa ni John Lennon, ““Being honest may not get you a lot of friends but it’ll always get you the right ones.”
• Mogahin gyud ka og oras sa imong mga higala bisan pa man sa imong ka-busy. Kun lagyo mo sa usag-usa, magpadala og simple nga pagpakamusta pinaagi sa text message o ba kaha sa chat.
• Kun dunay dalaygonon nga gibuhat ang imong mga higala, ayaw pagpanagana sa paghatag kaniya og tam-is nga mga pulong. Makahatag ka na og pahiyom sa pag-appreciate sa ilang gipangbuhat.
• Kahibalo usab ka magpasalamat sa mga butang nga ilang nabuhat diha kanimo. Ipabati kanila kun unsa nimo sila ka importante sa imong kinabuhi.
• Kun dunay sila’y isulti o ikumpisal kanimo, imoha gyud kini nga paminawon aron makatampo usab ka sa imong ideya.
• Kun makasala ka, kinahanglan kahibalo ka mangayo og pasaylo. Dili na kinahanglan ang taas nga garbo. Ang labing importante nga dili maguba ang inyong panaghigalaay.
• Ayaw ipanabi ang sekreto sa imong suod nga higala. Nisalig sila kanimo maong gisultihan ka sa ilang mga sekreto. Pagbaton og respeto kanila.
• Sa nagkalain-lain nga mga butang, naa pud mo’y tagsa-tagsa nga opinyon. Ayaw mo paglalis respeto ra gyud ang kinahanglan niini. Pasagdi ang lahi pud niya nga opinyon.
• Ayaw gyud libaka ang imong higala. Dili makahatag og kaayohan sa inyong panaghigalaay ang pagsakay sa mga tsismis.
Importante ang bonding, ug usa kini sa mga butang nga makapalig-on sa inyong panaghigalaay.