Super hit at maraming gumaya sa post ni Heart Evangelista na bongga ang OOTD nang magpunta sa grocery para lang bumili ng corned beef. Ang daming naglabasang meme at parody ng post na yun at matagal pinag-usapan.
May bago na namang post si Heart na pinag-usapan agad at mabilis na ginaya ng netizens. Ito yung post niya na naka-designer clothes habang naglilinis ng banyo. Pink ang comfort room at naka-pink din si Heart. Ang caption nito sa kanyang post ay “And this is my look for today as I clean my toilet.”
May gumaya kay Heart, kuntodo bihis habang nagpapakain ng mga baboy. Yung isa namang beki, naka-gown habang nagluluto.
Nakakaaliw din ang mga comment, sabi ng isa, mas maganda ang banyo na nililinis ni Heart kesa sa bahay nila. Comment naman ng isa pa, mas malinis pa ang banyo kesa bahay nila at pwedeng tulugan sa linis.
May nag-comment pa na sa sobrang linis ng banyo at mamahalin , ‘di siya magtataka kung more than P1m ang halaga nang pagpapagawa noon.
Samantala, sinagot ni Heart ang tanong ng isa niyang follower kung bakit hanggang ngayon, wala pa rin siyang project?
“Sorry but soaps isn’t really the priority now. I’ll be on starstruck though soon!”
Sa June na raw ang airing ng Starstruck 7 at dito, twice a week mapapanood si Heart bilang isa sa council kasama si Cherie Gil at isa pang council na ayaw pang pangalanan.
Napanood namin ang short teaser ng Starstruck, pero sina Dingdong Dantes at Jennylyn Mercado pa lang bilang Male & Female Hosts ang ipinakita. Hindi pa nga buong mukha ang ipinakita dahil si Dingdong, likod lang ang nakita at si Jennylyn ay eye area pa lang, pero alam mong silang dalawa ang nasa video.
Wala pa rin sa video si Kyline Alcantara na siyang online host.
P. Duterte hindi rin namukhaan si John Lloyd
Kahit si President Rodrigo Duterte hindi agad nakilala si John Lloyd Cruz nang makita sa ibinigay na dinner ng presidente sa mga celebrity na sumuporta sa kanya.
“Kita ra ba nako si... kami ni, didto sa party sa Malacanang. ‘Di k kaila sa iyang bana. Nagpatubo og bungot, nagpataas og buhok.”
May lumabas ngang litrato si John Lloyd kasama si Martin Andanar na ang sabi, reunion nilang dalawa ‘yun. Dati kasing nagtrabaho sa ABS-CBN si Martin.
Nakwento rin ni Pres. Duterte sa speech niya sa Davao City na nakuwento niya sa anak na si Baste Duterte ang pagkikita nila ni John Lloyd. Kung natatandaan ninyo, nakarelasyon ni Baste si Ellen Adarna bago naging sina Ellen at John Lloyd.
Ang pagpapagupit ni John Lloyd ang isa sa inaabangan sa showbiz dahil pag ginawa niya yun, ibig sabihin, ready na siyang bumalik sa showbiz.
Rayver at Janine malabo pang magka-trabaho
Malabo pa ring magtambal ang magdyowang Rayver Cruz at Janine Gutierrez dahil sa bagong soap ni Rayver, sina Kris Bernal, Kim Domingo at Megan Young ang makakasama ng aktor.
Pinamagatang The Haunted Wife ang bagong Afternoon Prime ng GMA-7 at kung ibabase sa title, may namatay na asawa.
Hindi pa nag-storycon dahil nasa New York pa si Rayver para sa Studio 7 Musikalye sa Brooklyn. Si Megan naman, kasama si Mikael Daez na nagbabakasyon sa Belgium.
Kaya hindi pa alam kung sino sa three girls ang multo.