CEBU, Philippines — Mitumaw sab ang pangalan ni Angel Locsin kinsa mahimong ihulip ni Liza Soberano sa papel isip si Darna. Gani, diretso nga mitubag ang aktres nga naluoy siya sa kahimtang ni Liza gumikan kay nabati niya nga wala sa maayong kondisyon sa emosyonal nga bahin ang young actress. Dugang pamahayag pa ni Angel nga kun tanyagan siya sa maong role, dili kini niya dawaton apan dako ang iyang pasalamat nga aduna pay mga tawo nga mituo ug misuporta kaniya apan sa pagkakaron, dili una kini niya dawaton.
Certified fitspiration
Gimintinar gyud ni Bianca King ang iyang sexy body karon nga 33 anyos na siya. Matud pa sa aktres nga consistent gyud ang iyang vegan diet ug dili gyud niya hikalimtan ang pag-yoga.
Sulit ang bakasyon
Gi-enjoy gyud pag-ayo ni Maja Salvador ang iyang bakasyon karon nga wala pa kaayoy misulod nga proyekto alang kaniya. Gani, mitikang ang aktres kauban ang iyang boyfriend nga si Rambo Nuñez sa Pampanga aron nga makasinati sa pagsakay sa hot air balloon. Maingon sa aktres nga sulit gyud ang iyang bakasyon karon.
Swerte sa girlfirend
Maingon ni Gab Valenciano nga swerte gyud siya sa iyang girlfriend karon nga si Joann Santiago. Matud pa niya nga mas ninindot ang dagan sa iyang kinabuhi sukad nga miabot kini sa iyang kinabuhi gumikan kay mao kini ang kanunay nga miunong kaniya bisan og aduna siya'y mental issues. Gihulagway ni Gab nga ang iyang girlfriend mao ang labing pasensyoso nga tawo sa iyang kinabuhi.
Dili patunto
Mipahibalo ang PBB Otso adult housemate nga si Fumiya Sankai nga magmabinantayon sa mga gimugna nga mga fake accounts kun diin gigamit ang iyang identipikasyon. Giyagyag gyud niya sa iyang official account ang usa ka account aron adunay alamag ang iyang followers. "This is a fake account! From this [account], you may think I’m the one managing since my name and photos are used. Please don’t be fooled,” suma pa ni Fumiya.
Kuwaresma
Gipagawas na kagahapong adlawa ang teaser trailer sa labing una nga pagabidahan nga horror film ni Megastar Sharon Cuneta nga "Kuwaresma". Ang full trailer niini ipagawas karong Mayo 15. Makauban ni Megastart sa maong pelikula si John Arcilla.
Pasok sa ang probinsiyano
Karon nga daghan ang nangawala nga mga karakter sa Ang Probinsyano, mosulod na sunod semana si Reymart Santiago. Sa maong serye, siya mao si Police Major Victor Basco kinsa mao na sab ang bag-ong kaaway ni Coco Martin.
Lakip sa international film
Gikumpirma ni Heart Evangelista nga mahimo siya nga kabahin sa usa ka international action film. Wala pa mihatag og kinatibuk-ang detalye ang aktres. Nanghinaot siya nga mapagawas ang maong pelikula dinhi sa nasud.
Makaguba sa reputasyon
Isip usa ka public figure, matud pa ni Kapuso news anchor Atom Araullo nga mabinantayon gyud kaayo siya sa iyang mga ipagawas o i-post sa iyang social media accounts. Matud pa ni Atom nga ang social media karon mao na karon ang labing gamhanan nga butang nga makaguba sa reputasyon sa usa ka tawo.
Dili mokumpirma
Gitug-an ni Arjo Atayde nga dili gyud siya mokumpirma sa publiko kun unsa na gyud ang status nilang duha ni Maine Mendoza. Mao pa niya nga naglikay lang siya sa mga dili maayong mahitabo karon nga napuno sila sa batikos. Giproteksyonan lamang sab ni Arjo ang iyang pamilya human nga makadawat og death threats.