CEBU, Philippines – Palahi nga teleseye apan nagtangag og daghan nga mga pagtulun-an. Mao kini ang bag-ong idalit nga teleserye sa GMA-7 nga nag-ulohan og “Sahaya” nga mosikad na karong March 18, Lunes.
Ang maong serye pagabidahan ni Bianca Umali, ug makauban niya sila si Miguel Tanfelix ug StarStruck” Season 6 Ultimate Male Survivor Migo Adecer
Modala si Bianca sa karakter sa usa ka Badjao, kinsa nipatigbabaw sa pagpanalipod ug pag-amuma sa ilang kultura.
Gipasigarbo pag-ayo ni Bianca ang maong proyekto gumikan kay nabaid gyud og samot ang iyang abilidad sa pag-arte ilabi nga napuno kini og mga bug-at nga esena.
Suma pa sa aktres nga dili basta-basta ang pagpangandam niya sa maong teleserye gumikan kay gitun-an gyud niya og maayo ang kultura sa Badjao ilabi na ang pinulungan niini.
Duna’y research team ang nitikang gyud sa Mindanao aron maseguro nga dili sila masayop sa pagpadangat sa pipila ka mga esena.
“Para naman hindi kami magkakamali, ilang araw nag-stay yung production team sa isang lugar sa Mindanao,” saysay ni Bianca sa dihang nahinabi sa E-Group sa pagtikang niini dinhi sa Sugbo alang sa promosyon sa maong teleserye.
Dugang pa sa aktres, duna pud sila’y mga consultant nga suweto sa kultura sa mga Badjao.
“Medyo challenging yung Sahaya, kasi merong mga esena na first time ko talaga na ginagawa,” matud pa niya.
Todo usab ang iyang training sama sa skydiving gumikan kay gikinahanglan kini sa ubang esena.
Sa habig ni Miguel, malipayon kini gumikan kay nagpadayon gihapon ang tandem nila ni Bianca sa TV screen ug gipasigarbo niya ang iyang ka-loveteam nga nakaangkon kini og title role.
Gipasalig ni Miguel ngadto sa ilang fans nga dili niya pakyason ang pagpalambo sa pulido nila nga chemistry.
Samtang si Migo sa iyang bahin, mapasalamaton kaayo siya sa GMA-7 sa dakong pagsalig nga gihatag kaniya.
Nasayran nga sa seryeng “Inagaw Na Bituin” unta ibutang si Migo apan dali siya nga gi-pullout ug gibalhin sa Sahaya.
“I feel blessed that there’s a lot of options. I let go of the wheel and let the management choose for me. If I can’t trust my management then who can I trust, right?,” saysay pa ni Migo kinsa kontento ra sa iyang mother network ilabi sa pagpadagan sa iyang career.
Tsika pa ni Migo nga nakita gyud niya kun unsa ka matinud-anon ang production sa ilang trabaho aron dili makamugna og sayop nga pasundayag.
“The good thing about this is that we’re not going to release anything unless it’s 100 percent true,” dugang pa ni Migo.
Malipayon siya nga gumikan sa maong serye nadugangan ang iyang higala sa showbiz .
“Noong una, tahimik lang ako sa set, hanggang nakapag-adjust na ako. Before kasi, we only really see each other in guestings, around GMA,” matud pa niya.
Modala si Migo isip karibal ni Miguel sa kasing-kasing ni Bianca.