CEBU, Philippines – Padayon nga naglawig dinhi sa Pilipinas ang mga awit sa sikat kaayo nga South Korean boy band nga iKON.
Ang maong grupo maoy nagpasikat sa awit nga “Love Scenario,” “Killing Me” ug “Bling Bling.”
Matud pa sa usa sa mga miyembro niini nga si Jay nga target sa iyang grupo nga mobalik sa nasud gumikan kay na-feel gyud nila kun unsa sila ka pinangga sa ilang Pinoy fans.
Kahinumdoman nga nagmalampuson ang ilang concert dinhi sa Pilipinas sa miaging adlaw.
Sugboanon maoy first-runner up
Napili nga first-runner up sa bag-ohay lang nga grand finals sa WishCovery Season 2 ang Sugbuanon nga si Nashrene Casas kinsa gidumala sa kampo sa sikat kaayo nga singer nga si Top Suzara.
Ang grand finals gipahigayon sa Smart Araneta Coliseum niadtong Martes sa gabii.
Dakong garbo alang kang Nashrene nga nakasulod siya sa grand finals ug gipamatud-an niya nga dili gyud basta-basta ang taga Cebu sa natad sa pagkanta.
Walo ang nagsangka sa grand finals nga nagikan sa nagkadaiyang dapit sa nasud . Gikanta niya ang original composition ni Suzara nga “Light In The Dark”. Tipik sa premyo ni Nashrene, iyahang igahin sa EPCALM Adult Leukemia Foundation of the Philippines ug Abtanan Sa Kaluoy .
Ang taga Taguig nga si Rhea Basco maoy grand champion ug nagikan siya sa Camp Jungee.
Napili usab nga second runner-up si Jemy Picardal nga nagikan sa Camp Rannie , ug third runner-up si Paula Guevarra sa Camp Ortiz. Ang maong kompetisyon gidumala sa Wish 107.5
Alone/Together naka-P265M na!
Nagmaya og maayo ang Kapamilya love team nga sila si Liza Soberano ug Enrique Gil gumikan kay nikita na og kapin sa P265 million ang pelikula nila nga Alone/Together nga gipasalida sa mga sinehan sukad niadtong February 13.
“Alone/Together” grossed P265,228,810.89 as of February 26, “ suma pa sa statement sa Black Sheep .
Si Antoinette Jadaone ang direktor ug writer sa “Alone/Together” nga nagtuki sa love story nila ni Christine (Liza ) ug Raf (Enrique), ang kanhi mag-uyab nga nagkasugat og balik ang ilang mga dalan.
Despacito nanghawod sa YouTube
Mikulit na og kasaysayan ang mega-hit nga “Despacito” gumikan kay nilangkat na kini og kapin sa six billion views sa YouTube.
Ang maong awit gipasikat sa Puerto Rican singer nga si Luis Fonsi.
Kahinumdoman nga gi-release ang music video niini niadtong January 2017.
Gipalukapa niini ang record sa Gangnam Style nga giawit sa South Korean singer nga si Psy nga nakalangkat lang 3.3 billion views.
Alessandra mibalik sa GMA
Human sa taod-taod nga paglugwa sa ABS-CBN, nibalik na pud sa nataran sa GMA-7 ang aktres nga si Alessandra de Rossi.
Malakip ang aktres sa “Homecoming” episode sa Wish Ko Lang karong Sabado, March 2. Nasayran nga nipirma og kontrata si Alessandra karong tuiga sa Viva Artist Agency.
Walay problema
Nitambong sila si Daniel Padilla ug Kathryn Bernardo sa bag-ohay lang nga grand premiere sa pelikulang “Familia Blondina.” Gibidahan kini sa inahan ni Daniel nga si Karla Estrada. Ang paglugwa nila ni Kathryn ug Daniel sa maong kalihokan nagpakita nga wala’y problema ang relasyon sa duha sukwahi sa nigawas nga tsismis nga matud nagtakilid ang ilang relasyon.
Dakong kantidad
Moabot ngadto sa P230,000 ang gipadala nga hinabang ni Coco Martin ngadto sa pamilya sa namatay nga indie actor nga si Kristofer King. Kahinumdoman nga niduaw si Coco sa haya ni Kristofer sa miaging gabii. Nagkauban sila si Coco ug Kristofer sa pipila ka mga pelikula kaniadto.
Baby Penelope
Gipaila na ni Nathalie Hart sa publiko ang iyang anak nga si Penelope pinaagi sa iyang Instagram post. Nagmalipayon og samot si Nathalie sa iyang kinabuhi sukad naabot si Penelope. Dili pa matino ni Nathalie kun kanus-a siya mobalik sa showbiz.
Nag-reunion
Nag-reunion sa miaging gabii ang Kapuso actress nga si Gabbi Garcia kauban ang Kapamilya stars nga sila si Kathryn Bernardo ug John Manalo . Nagkauban ang tulo kaniadto isip mga modelo sa usa ka pangbata nga brand sa sapot.
Tsismis ra
Giklaro ni Loisa Andalio nga wala’y laing tawo nga malambigit sa higayon nga magkalalis sila gamay sa iyang boyfriend nga si Ronnie Alonte. Kahinumdoman nga niulbo ang tsika nga duna’y nagpa-cute nga laing babaye ngadto kang Ronnie.
Nataypan si Kris
Gi-release na sa miaging adlaw ang music video sa “Larawan Mo” nga giawit sa produkto sa The Clash nga si Anthony Rosaldo. Si Kris Bernal maoy kapares ni Anthony sa maong music video. Suma pa ni Anthony nga siya mismo ang nagpili kang Kris gumikan kay nataypan gyud niya ang kaanyag niini.
Courtesy call
Nibisita si Miss Universe 2018 Catriona Gray sa buhatan ni Vice President Leni Robredo sa miaging adlaw. Nidalikyat usab siya sa buhatan ni Senate President Tito Sotto ug sa uban nga mga senador. Wala usab niya palabya ang pagtikang sa opisina ni Department of Tourism (DOT) Secretary Bernadette Romulo-Puyat.
Nagkalig-on
Bisan paman nga lantaran kaayo sila si Nadine Lustre ug James Reid sa kasikas sa ilang relasyon, gitataw sa duha nga duna gihapo’y ubang mga butang nga gihimo nila nga pribado. Malipayon kaayo sila si Nadine ug James gumikan kay nagkalig-on gyud sila samtang nagkadugay ang ilang relasyon.
LDR
Gikumpirmar ni Karla Estrada nga long distance relationship (LDR) ang istado nila sa iyang non-showbiz boyfriend . Pito ka tuig na ang relasyon nila sa maong lalaki. Ang matag-adlaw nga pagkontakay maoy ilang sekreto aron dili sila mingawon sa usa’g-usa.
‘Ohnanana’
Wala magpalupig si Maja Salvador ug gisuwayan gyud niya ang uso na kaayo nga ‘Ohnanana’ dance challenge . Wala na hinuon makugang ang netizens sa iyang video sanglit naa sa kasayoran sa kadaghanan kun unsa ka maayo mosayaw ang aktres.