CEBU, Philippines — Nagmaya ang Star Cinema ug ang mga naglangkob sa pelikulang Alone/Together human kini nihipos og P200 million basi sa box-office record niadtong Huwebes.
Ang maong pelikula nga gibituonan nila ni Liza Soberano ug Enrique Gil, nilugwa sa mga sinehan lukop nasud niadtong nilabay nga semana.
Kasamtangang tua karon sa Dubai ang nahisgutang mga bida, alang sa nagkadaiyang screening sa maong pelikula didto.
Pang Hollywood star
Nahugyaw ang netizens sa kaanyag sa anak sa supermodel nga si Wilma Doesn’t niining bag-o lang.
Kini human nag-upload si Wilma og mga hulagway sa iyang anak nga si Asiana nga nitambong sa prom niini.
Maanyag nga daw Hollywood actress matud pa ang dagway sa 16-anyos nga si Asiana, suma pa sa netizens.
Si Wilma labihang nakapasalamat sa mga nitabang aron makuha gyud ang look nga buot niya alang kang Asiana. Ang iyang gipasalamatan mao sila si Jing Monis, Junnie Sierra ug Randy Ortiz.
Suma pa mapasigarbuhon kaayo siya sa kaanyag sa iyang anak nga dalagita.
Mga ulan ug tikbalang, nag-look test gyud!
Niabot og siyam ka bulan ang production sa pelikulang “Ulan” sa Viva Films diin bida sila si Carlo Aquino ug Nadine Lustre.
Kini kay gisiguro gyud sa direktor nga si Irene Villamor nga perpekto ang mga eksena ug makuha gyud niya ang iyang gusto nga samputanan sa pelikula.
Gani, mismong mga tikbalang nga gipakita sa poster, katulo gipailawom og “look test” aron pagsiguro nga haom gyud sila tan-awon sa eksena. Daghan ang nagtuo nga suspense-thriller ang maong pelikula gumikan sa tikbalang, apan matud pa kabahin kini sa gugma ngadto sa imong kaugalingon. May “look test” sab sa nagkadaiyang matang sa ulan sanglit importante matud pa kini ngadto sa istorya ilabi na sa character ni Nadine.
Nasayran nga duol gyud kining maong pelikula sa kasingkasing sa direktor nga si Villamor, sanglit mao kini ang labing una nga script nga iyang gisuwat, 13 ka tuig na ang nilabay.
“This is my first ever script originating from a short story I wrote thirteen years ago and also from a directing class video exercise in UP Film,” butyag pa ni Villamor. Protégé ni Bb. Joyce Bernal si Villamor. Siya ang nagsulat sa script sa mga pelikulang Camp Sawi, Meet Me in St. Gallen, ug Sid & Aya: Not A Love Story.
Samtang gidayeg ni Villamor ang iyang mga bida niining maong pelikula nga sila si Carlo ug Nadine kay matud pa, gihatagan sa duruha og tukma ug maanindot nga hustisya ang ilang mga role. “Nadine as Maya gave the movie a different feel that I didn’t expect.
“I told her I needed to see this movie as a journey with her and she gave me a very good ride.
“We bonded over a lot of womanhood stories and being goddesses, ha ha ha!”