CEBU, Philippines – “Be humble of what you have and always welcome tips from your co-photographers, ma professional or beginners. Dili ko ka ingon nga hingpit na nako nga nakab-ot ang akong break sa photography kay para nako, every shoot is a learning process kay imong nakat-onan karon pwede ugma dili napud na in sa henerasyon. Kay in every shoot, lain-lain nimong masugatan nga challenge ug lain-lain nga achievements ug kini nag depende sa sitwasyon.”
Mao kini ang gipaambit ni Jess Agan, usa ka photographer sulod na sa dul-an sa usa ka dekada ug nagpuyo sa Dakbayan sa Lapu-Lapu.
Nagsugod ang iyang hilig sa pagpangodak sa dihang nangandoy lamang siya kaniadto nga makabaton og DSLR nga camera.
Tuod man, sa pag-abot sa panahon nga nakapanag-iya na siya niini, kanunay na siyang agnihon sa iyang mga higala nga photographer nga mohimo og mga landscape photography shoot.
Sukad niadto, mas napalambo pa ang iyang kaaktibo ug paghigugma sa photography.
Sa kasamtangan, ubay ubay na nga mga kompanya ug personalidad ang nahimo niyang mga kliyente, sama nilang Monique Lhuillier nga usa ka international fashion designer, Mrs. Asia Pacific Bess Telidua, Jessy Mendiola, Maja Salvador, Venus Raj, Shamcey Sup-sup, Daniel Matsunaga, ug uban pa.
Makadaghan na sab nga gikuha ang iyang serbisyo sa MLhuillier Group of Companies, M-Talent Events and Promotion, AMAIA Land, San Remegio Beach Club ug Book Art Press.
Nituo siya nga tungod sa iyang pagka dedicated sa trabaho, nagkasaka ang iyang mga kliyente ug daghan siya’g mga repeat customers.
Kusog ang iyang serbisyo sa nature photography, wedding photography, street photography ug sa corporate shoot.
Dugang pagpaambit ni Jess, sa wala pa siya hingpit nga ni- focus sa pagpangodak, usa siya ka manager sa usa ka dakong NGO sa Sugbo.
Sa pagkakaron, ang iyang mga kinitaan sa pagpangodak maoy nag binugtong niyang pangita nga maoy dako niyang gikatampo sa inadlaw-adlaw nga galastuhan sa iyang pamilya.
Ang labing dili niya malimtan ug maanindot nga kasinatian sa iyang propesyon mao ang iyang paglibud suroy sa mga nagkadaiyang lugar sa Pilipinas samtang mokita og kwarta pinaagi sab sa paghimo sa butang nga iyang gustong buhatun matag karon ug unya, ang pagpangodak.
Dako sab niyang kalipay sa matag panahong ma- capture niya ang mga importanteng moments sa iyang mga kliyente dinuyugan sa paghatag niya og maanindot nga mga output niini.
Mapasalamaton siya sa iyang mga kaubanang photographers sa pagpaambit kaniya sa mga nahibaw-an nila sa maong natad labi na gayud sa suod niyang higala nga si Jhunny Ngujo.
Iyang giangkon nga tungod niini, mas daghan pa siya’g nakat-onan sa photography.
Samtang pahimangno ni Jess sa mga tawo ngagustong mo-invest sa camera ug planong mosulod sa kalibutan sa photography, kinahanglang sutaon gyud og maayo kung passion ba gyud nila ang pagpangodak o kun mopalit ra sila niini tungod kay maoy in karon.
Sa maong paagi matud pa dili masayang ang kwarta nga ipalit sa mga mahalong camera ug mga heramenta niini.