Tukmang panahon alang kang Jessa

CEBU, Philippines — “Dili gyud sa tanang panahon makadaug ka, naa sab gyu’y panahon nga mapildi ka. Maabot rajud ang sakto nga panahon para sa imoha”.

Mao kini ang gihuptan nga pagtuo sa 20 anyos nga natuboy nga Sinulog Idol Season 10 Grand Champion nga si Jessa May Abaquita.

Maingon nga mao na sab gyud kini ang tukmang panahon ni Jessa nga mosalmot sa maong dako nga kompetisyon sa Sugbo matag Sinulog.

Gumikan sa mga kakulian ug mga prayoridad ni Jessa kaniadto, mibalibad una siya nga mopadayon og salmot sa Sinulog Idol.

“Breadwinner ko sa amoa. Halos kada gabii, naa koy apilan nga contest para pangita ug ganahan sab gyud ko nga makatabang sa akong pamilya”, tug-an pa ni Jessa.

Kun madungog ang pangalan nga Jessa May, daghan gyud ang muingon nga sikat ug gikaintapan siya nga amateurista dinhi sa Sugbo apan karon, kun madungog na ang samang pangalan, aduna na siya’y bag-o nga titulo ug mao kini ang labing bag-o nga Sinulog Idol.

 “Sobra kaayo ko ka kalipay ug dako kaayo ni nga grasya dili lang nako, asta na sab sa akong pamilya”, padayag pa ni Jessa.

Kun pamilya na ang istoryahan, dili gyud malimod ni Jessa nga buhaton niya ang tanan aron lang nga makatabang sa panginahanglan sa iyang kabanay.

Bata pa lang si Jessa, nakat-on na siya sa pagpanginabuhi. Ang iyang tingog ang nahimo niya nga puhunan.

Sama sa iyang amahan nga si Bobby Abaquita, mao sab ang nahimong panginabuhi niini kaniadto.

Istorya pa ni Jessa nga sa edad nga 6 anyos, nakat-on siya og kanta. Ang iyang amahan mao ang labing una niya nga magtutudlo aron nga mabaid ang iyang talento.

Dili makalimtan ni Jessa ang mga pasiunang mga lakang nga gibuhat sa iyang amahan sa dihang magsugod na sila og praktis.

“Kanang mag practice mi ni papa ug mag-jogging mi kada buntag kay para motaas daw ang hangin unya hapakon og silhig ako’ng tiyan”, paghinumdom pa niya.

Dugang pa nga ang paagi sab sa pagpahanas niya sa iyang pagkanta mao ang kanunay nga pagsalmot sa mga singing contest sa nagdaiyang bahin sa Sugbo.

Bisan pa man og dako ang pagmahal ni Jessa sa pagkanta apan dili sab niya malimod nga dakong sakripisyo sab ang iyang nabuhat tungod kay adunay higayon nga minus lang ang iyang pahuway tungod sa sagunson nga pagkanta matag  gabii ug motungha na sab sunod adlaw.

“Naabot sa point nga kinahanglan na gyud nako nga moundang og skwela para makatabang sa akong pamilya. Gi-give up sa nako akong pagskwela kay naglisod gyud ko og kapoy  nga mokanta sa gabii unya skwela na sab sayo sa buntag. Mura’g di na madala sa akong lawas”, suma pa niya.

Tuod man, positibo si Jessa nga ang iyang mga nasinati nga kalisdanan dili  mulungtad mao nga kanunay siya nga mohalad og pag-ampo aron nga magiyahan siya  kun unsa ang maayo nga buhaton.

Gumikan kay dako ang iyang pagsalig sa Ginoo, nakalingkawas na siya niini ug karon nagpadayon na siya sa iyang pagtungha  sa University of the Visayas ug gikuha niya ang kurso nga Hotel and Restaurant Management.

Tinguha gyud ni Jessa nga makalampos sa iyang pagtungha aron nga makakita siya og maayo nga pamaagi  nga malingkawas sa  kalisod ang iyang pamilya.

Karon nga nakaangkon na og dako nga titulo si Jessa sa Sinulog Idol, tataw na nga daghan ang magsingabot nga maayo nga mga  opurtunidad  ngadto kaniya.

Daw wala damha ni Jessa nga siya ang matugyanan sa maong dako nga ganti apan mapasalamaton siya sa iyang naangkon ug naabot sa kompetisyon. Mapasalamaton sab siya sa Labaw’ng Makagagahum tungod kay nakab-ot niya ang iyang tinguha sa iyang pagsalmot sa maong sangka.

“To win. Mao jud na akong gi-aim sa akong pag-apil sa Sinulog Idol ug wala ko magdahum nga maabot nako”, suma pa niya.

Dakong pasalamat ni Jessa sa mga hurado nga nisalig kaniya sukad sa iyang ikatulo nga pagpatim-aw sa audition.

Una nga miapil si Jessa niadtong 2013 ug gisundan kini niya niadtong 2015 apan wala siya modayon gumikan kay dili pa niya mahatag ang gihangyo sa mga nagdumala sa kompetisyon nga talikdan ang mga sideline niya sa pag-apil sa mga barangay singing contest.

Apan niadtong 2018, hingpit na iyang desisyon nga dayunon ug hatagan na og prayoridad ang iyang pagsalmot sa Sinulog Idol.

Matud pa ni Jessa nga ang iyang inahan nga si Jessan Abaquita mao ang mituklod kaniya nga magpaubos sa audition.

Bisan pa man nga nagikan pa siya og show didto sa Camotes apan mihapit gyud siya sa audition tungod kay aduna siya’y pamati nga mao na kini ang tuig alang kaniya.

“At first kay nakulbaan kaayo ko ato kay kato pa gyud ko naka-audition pagbalik. In fact, maklaro sab gyud sa akong pag-audition nga shaky kaayo akong voice but I’m so happy kay nalipay sab sila nga nakakita nako nga ni-audition balik,” ambit pa ni Jessa.

Maingon nga mao gyud kadto ang naghatag kaniya og kusog aron ipadayon ang pagsalmot karong tuiga.

Gusto sab nga pamatud-an ni Jessa nga dili lang kutob sa barangay ang iyang tingog ug haum sab siya nga dinagko nga mga kompetisyon sama sa Sinulog Idol.

Karon nga siya na ang naghupot sa maong dako nga titulo, andam siya nga modawat sa katungdanan nga itugyan ngadto kaniya.

Mapasalamaton siya sa tanan nga gasa ug suporta nga iyang nadawat human sa iyang kadaugan.

“Salamat kaayo tanan sa way puas nga  nisuporta diri nako. I’m so thankful and overwhelmed nga naay niabiba nako bisag wa ko nakaila but nag suporta gyud nako, salamat kaayo.”

Gitagamtam pa sab gyud ni Jessa ang iyang tam-is nga kadaugan apan nagplano na sab siya nga kun moabot ang tukmang panahon, mosalmot suya og mga dagko nga kompetisyon sa telebisyon.