Awit alang sa kabataan nagmadaogon

CEBU, Philippines —  Nagmadaogon ang  gimugna nga kanta ni Jade Castro nga nag-ulohan og “Kabataan, Bag-Ong Katilingban” sa nahitabong ika-39 nga Cebu Pop Music Festival niadtong Biyernes, Enero 18, 2019 didto sa IC3 Convention Center.

Ang maong awit mao ang nahimong Grand Champion sa kategorya nga “Awit sa Pagpakabana” .

Gihatagan kini og kinabuhi sa  The Voice Kids Season 3 Semi-Finalist nga si Yessha De La Calzada kinsa mao usab ang napili nga  “Best Interpreter” ..

“I am happy and proud of myself”, mubo nga pagpadayag sa 9 anyos nga bata.

Nakuha usab sa  maong awit ang “People’s Choice Award human nga nakaangkon kini  og 8,900 likes ug 102, 429 shares sa  Facebook.

Gikalipay pag-ayo sa composer sa maong kanta nga si Castro  ang maong kadaugan nga naangkon sa iyang kampo.

“Happy kaayo kay wa ko nag-expect , kay lisod kaayo ang kompetisyon karon kay all over the Philippines na tungod kay naa nay online submission. Daghan na kaayo og  songwriters nga ni-submit karon ug nindot kaayo kay daghan na kaayo nga klase sa kanta ang atong madungog tungod sa Cebu Pop. Bisan lisod hunahunaon pero mapasalamaton kaayo ko og dako ni Senyor Santo Niño kay gipadaog niya ang akong entry”, pagpadayag pa ni Castro.

Ingon nga taud-taud na sab nga wala makadaog si Castro sa maong kompetisyon ug mao kini ang maingon niya nga pagbangon pagbalik nga modominar sa usa sa iyang mga gikahinamang salmutan nga kompetisyon matag tuig.

“Matag tuig gyud ko nga mag-apilan. Actually, akoang nalampasan  ang curse since nabalhin ang Cebu Pop diri for 3 years gikan sa Cebu Coliseum, sigi ko og pasulod og entry pero karon pa gyud  nasulod ang akong entry”,” dugang pa niya.

Daw dili masukod ang iyang kalipay nga gumikan kay pipila ka tuig na sab ang milabay una niya nga nadunggan pagbalik ang iyang pangalan ug ang binuhat nga  awit nga  midominar sa kompetisyon.

“Last time pa nako nga nakadaog kay didto pa gyud sa Cebu Coliseum mao nga nindot kaayo paminawn karong tuiga nga usa kos nakadaog ug dili lang grand champion kay naa gikan sab sa akong kampo ang Best Interpreter ug People’s choice. Worth it ang tanang paningkamot”, dugang pa niya.

Nag-umol og  kanta ni Castro alang sa  karon nga henerasyon nga nga  padayon nga mobuhat og sakto ug motoo og Ginoo .

Samtang, ang awit nga “Kon Pwede Lang” nga sinuwat ni Jesson Albaran ug gihatagan og interpretasyon sa kanhi  Tawag ng Tanghalan contender ug House of singer  nga si Gerlyn Abaño mao ang nahimong grand champion sa kategorya nga  “Awit sa Gugma”.

“Wala pa gyud ni-sink in pero nalipay gyud mi. Nalipay mi sa among naabtan karon ug daghang Salamat gyud ni Senyor Santo Niño”, padayag pa ni Albaran.

Nahimong inspirasyon ni Albaran ang usa ka relasyon nga naa pa sa mutual understanding status.

“MU silang duha pero nailog sa lain ang ka-MU. Didto nalang ko nakahibalo nga sila na diay sa katong nag-ilog. Wala na koy choice but to let them be and let go sa akong ka-MU”, esplikar pa ni Albaran.

Matawag sab ni Albaran nga swerte ang iyang pagsalmot karong tuiga. Matag tuig na sab siya nga tigsalmot sa maong kompetisyon.

Unang entry niya nga nakasulod sa kompetisyon mao ang “Uyab Ta Pero Dili Ta Magsaba” nga nalakip niadtong 2016.

Sa sunod nga kategorya nga “Huni sa Kasingkasing”, ang sinuwat nga kanta ni Eller Jeff L. Escarda ug Adonis Durado nga “Hugot Pas Huot”maoy champion.

Sila si DJ Mae Dente ug Asser Ace Dilao ang nahimong interpreters sa maong awit.

Ang pagpahigayon sa tinuig nga Cebu Pop Music Festival nagsilbi kini nga halad sa Mayor sa Dakbayan sa Talisay nga si Atty. Eduardo Gullas. Ang maong kalihukan mao ang nagsilbi nga taytayan aron sa pagpadayag sa dakong gugma niya  ngadto sa Balaang Bata nga si Señor Santo Niño ug ingon man sa pagpadayag sa pagmahal sa Sugbo pinaagi sa pagpalambo Sugbuanong musika.

Ang mahimong kategorya sa sunod tuig  ipahibalo sa umaabot sa umaabot nga mga adlaw  pinaagi sa Facebook page sa Cebu Pop Music Festival.

Special guest niadtong gabhiona mao ang international singer nga si Anna-Fegi Brown.