CEBU, Philippines — “Makaingun ko nga nakab-ot na gyud nako ang akong dakong break isip photographer niadtong year 2015 kung diin napili ko nga grand winner sa PAGCOR National Photo Contest sa tibouk Philippines ug katu sab tuig 2012 ug 2016 nahimo kong Grand Winner sa Bacolod Maskara Festival Photo Contest. As of this day, challenging na gyud kaayo ang photography kay daghan na’g bag-ong mga ka kompetinsya but for me ang akong gibuhat kay mo stick lang gyud ko sa classic ug quality approach in photography kay mao man nay akong signature touch sa pagpangodak. Anha pod ko mas nailhan sa akong mga kliyente.”
Mao kini ang gisaysay sa usa sa mga labing tinamod nga photographer karong panahona dili lang dinhi sa Sugbo kundi lukop Pilipinas.
Dose ka tuig nang nahimong photographer si Ariel Sayupan o kun mas naila isip Aying sa kadaghanan.
Halos dili na maihap ang mga dagkong pasidungog nga iyang naangkon isip photographer ug ubay- ubay na sab nga mga big-time personalities ug artists ang nahimo na niyang mga kliyente nga nibilib gyud sa iyang naangkong talento.
Pipila sa nakatrabaho niya nga dili gyud niya malimtan mao ang sikat nga si Brian McKnights.
Siya sab ang nahimong official photographer sa mga konsyerto nilang Anne Curtis ug Sarah Geronimo dinhi sa Sugbo.
Pagbalik lantaw ni Aying, nagsugod siya sa pagsulod sa kalibutan sa photography niadtong nagtrabaho siya sa usa ka advertising agency kung diin gawas nga siya’y mo shoot sa mga produkto niini, siya sab ang mo lay-out.
Apan una pa niining tanan, mapasigarbuhon niyang gipaambit nga usa siya ka Network Engineer sa Mitsumi kaniadto.
Sa pagkakaron, usa ang iyang pangalan sa kanunayng mopatigbabaw kung weddings ug corporate photography na ang hisgutan.
Mas daghan sab ang napabilib sa iyang talento sa dihang nadag-an niya ang mga nagkadaiyang National Photo Contests.
Dugang pagpaambit ni Aying, sa paglabay sa mga panahon, mga nagkadaiyang klase sab sa photography ang masugatan sa usa ka photographer.
Hinungdan nga sa iyang bahin, dili gayud siya muhunong sa pagpadayun og explore sa matag detalye sa in-na-in nga mga anggulo sa pagpangodak matag karon ug unya labi na gayud kung weddings na ang pagahisgotan nga maoy kanunayng nanginahanglan sa iyang serbisyo.
Insipirasyon niya sa tanan niyang pagpaninguha mao ang iyang mga anak.
Mapasalamatun siya sa Labawng Makagagahum sa gihatag niini nga talento kaniya.
Sanglit matud pa niya, mao kini ang nakapasustinir sa pagpatungha niya sa upat niya ka mga anak sa private school.
Tungod sa iyang pagkugi ug pagpaningkamot, dali ra sab niyang mahatag sa iyang mga anak ang mga panginahanglanon niini matag adlaw.
“For me, seasonal ra gyud ang photography, not everyday naay shoot. Thankful sab gyud kaayo ko sa akong mga clients ug mga customers sa weddings ug corporate events sa dako gyud kaayu nilang pagsalig kanako,” panapos pa niya.
BNH: Unsay dili nimo malimtan nga imong kasinatian isip usa ka photographer?
AYING: Kadtung nag-wedding ko sa Shangrila niadtong 2010. Ready kaayo ko ug ang akong kauban sa grand entrance sa couple sa reception area. Wala mi kahibawo nga naa diay champagne throwing sa grand entrance. While basa na kaayo mi, padayun lang gihapon mi sa pag- shoot until naka nakabantay ko nga basa na kaayo ang akong camera tungod sa champagne. Nag error na ang akong camera.
BNH: Unsa nga klase sa mga camera ang uso karon ug handy?
AYING: Mirrorless camera. Of course if mopalit mo, i-consider sab gyud ninyu ang quality ug brand sa camera.
BNH: Kinsa ang imong giidolo nga sikat kaayo nga photographer?
AYING: Lito Sy, Jerry Ghioniz ug C. M. Leung
Rewind:
Mga artistang nanganak sa 2018
Sa artikulo nga namantala sa abs-cbnnews.com kagahapon, ilahang gi-feature ang ang 26 ka mga artista nga nanganak karong tuiga.
1. Divine Lee - Nanganak kini alang sa labing unang anak nila sa iyang bana nga si Blake Go niadtong Mayo. Ang maong bata nga lalaki ginganlan og Basquiat.
2. Aubrey Miles - Nanganak ang aktres karong buwana. Babaye ang maong bata nila ni Troy Montero nga ginganlan og Rocket.
3. Pokwang - Sa unang bahin karong tuiga, gihimugso ni Pokwang ang himsog nga batang babaye nga si Maila. Mao kini ang anak nila sa iyang boyfriend nga American actor nga si Lee O Brian.
4. Sitti Navarro - Malipayon kaayo ang singer gumikan kay duna na sila’y liwat sa iyang bana nga si Joey Ramirez. Nanganak siya niadtong November ug ginganlan kini og Issiah Danelle.
5. Alyana Martinez - Babaye ang iyang anak nga ginganlan og Adalynn Riley kinsa nahimugso niadtong January. Si Roy Racam ang iyang bana.
6. Iya Villania - Ikaduhang anak na kini nila ni Iya ug sa iyang bana nga si Drew Arellano. Nanganak ang TV host-actress niadtong August. Alonzo Leon ang pangalan sa maong bata nga lalaki.
7. Isabelle Daza - Nanganak ang aktres sa labing una nila nga anak sa iyang French husband nga si Adrien Semblat niadtong Abril. Baby boy ang iyang gihimugso nga ginganlan og Balthazar.
8. Ellen Adarna - Giingong nanganak ang aktres niadtong June ug ang aktor nga si John Lloyd Cruz maoy gikatahong amahan sa bata.
9. Jolina Magdangal - Mao kini ang ikaduhang anak nila sa iyang bana nga si Mark Escueta. Nanganak ang aktres og batang babaye niadtong Mayo ug ginganlan kini og Vika.
10. Sarah Lahbati - Nanganak ang aktres sa ikaduhang anak nila ni Richard Guttierez niadtong March. Ang maong bata nagtangag sa pangalan nga Kai.
11. Lara Quigaman - Gihimugso ni Lara Quigaman ang ikaduhang anak nila ni Marco Alcaraz niadtong September. Tobias Nolan ang pangalan sa maong bata.
12. Isabel Oli - Nag-apong gyud ang aktor nga si John Prats sa pagpanganak sa iyang asawa nga si Isabel Oli niadtong November. Ang ikaduha nila nga anak ginganlan og Freedom.
13. Bianca Gonzalez - Naghudyaka niadtong October ang magtiayong Bianca Gonzalez ug JC Intal gumikan kay nahimugso na ang ikaduha nila nga liwat nga ginganlan og Carmen Eliana.
14. Shamcey Supsup - Nahimugso ang ikaduhang liwat nila ni Shamcey Supsup ug Lloyd Lee niadtong September. Ang maong nagtangag sa pangalan nga Peter Nathan.
15. Michela Cazzola - Ikaduha na kini nga anak ni Michela Cazzola ug sa baskteball star nga si James Yap. Gipanganak ang maong bata nga ginganlan og Francesca Michelle niadtong June.
16. Jewel Mishce - Unang liwat sa aktres ang baby girl nga si Aislah Rose nga gipanganak niadtong July. Si Alizter Kurzer ang bana ni Jewel.
17. Rich Asuncion - Niadtong December 3, gihimugso na sa Boholana nga si Rich Asuncion ang unang anak nila ni Benjamin Mudie. Ang maong batang babaye ginganlan og Isabella Brie.
18. Cristalle Belo - Niadtong Mayo gipanganak ni Cristalle Bello ang anak nila nga lalaki ni Justin Pitt. Ang maong bata nagtangag sa pangalan nga Hunter James.
19. Saab Magolona - Mao kini ang labing unang anak sa aktres ug sa iyang bana nga si Jim Bacarro. Nanganak si Saab og lalaki nga ginganlan og Pancho Gerardo niadtong February.
20. Sunshine Garcia - Nanganak ang kanhi Sexbomb dancer og batang lalaki niadtong September. Axel ang pangalan sa unang anak nila sa iyang bana nga si Alex Castro
21. Tricia Centenera - Nakabaton og unang liwat si Tricia niadtong November nga ginganlan og Arabella.
22. Jerika Ejericito - Kaluha ang anak nila ni Jerika ug sa iyang bana nga si Miguel Aguilar Garcia niadtong January. Ginganlan ang kaluha og Daniel ug Michael.
23. Carmen Soo - Niadtong Pebrero, nanganak na Malaysian star nga si Carmen Soo. Ang maong bata nga babaye ginganlan og Bea. Nisikat si Carmen sa nasud human nakauban niya kaniadto sa usa ka teleserye ang aktor nga si Jericho Rosales.