Aron dili mapaksit ang bulsa Anden Miles

CEBU, Philippines — Pipila na lang ka tulog, Pasko na, pero ang uban wala pa gyud ka plano kon unsay mahimo nila nga kalingawan sa pagsaulog niini.

Apan duna pu’y uban nga magpadayon ang ilang pagsaulog hangtod sa pagsugat sa bag-ong tuig.

Busy na usab sa pagpanuroy ang   kadaghanan karon.   Aduna’y uban diha nga padayon nga naghuna-huna kon unsa kaha nga regalo ang idalit nila sa ilang mga minahal sa kinabuhi.

Dili na kinahanglan nga mogasto mo og maayo karong panahona, ang labing importante nga magmalipayon ta.

Mahimo raman kini nga saulogon nga dili na kinahanglan nga mabuslot ang inyong bulsa.

Mao kini ang pipila ka  tips nga akong nahipos  alang sa minos nga pagasto sa pagsaulog sa Pasko o ba kaha sa Bag-ong Tuig.

•   Sigurado  ko nga duna mo’y mga paborito nga kan-anan ug dili pa gyud mahal. Apan kon ganahan mo nga dili namo mahasol sa pagbiyahe,  pag-food trip na lang mo sa inyong balay  aron kamo gyud ang mangunay sa pagluto sa  pagkaon. Uso pud karong panahona ang boodle fight.

• Hatagi ang imong minahal sa kinabuhi o mga higala sa butang nga mahimo nila nga magamit.  Dunay mga barato karon nga mga mug, baso, plato ug bisan unsa nga magamit sa kusina. Moingon ang uban nga common ra kaayo ang maong mga butang, apan ang labing importante nga magamit kini.

• Alang sa mga dunay uyab, dili lang kay panahon ra sa Valentines mahitabo ang paghinatagay.  Puwede usab kini nga mabuhat panahon sa Pasko.  Suwayi og hatag og buwak ang imong partner. Suma pa sa karaang panultihon, ang paghatag  og buwak  maoy usa sa mga  simbolo sa pagyagyag sa  feelings ngadto sa usa ka tawo nga iyang gihatagan niini.

• Kun single pa mo karong panahona, dili intawon na problema uy. Mahimo kaayo mo maglipay-lipay  pinaagi sa pagpanuroy uban sa inyong  higala o  ba kaha sa inyong pamilya. Uso baya nang gitawag og group date.