CEBU, Philippines – Gipasidan-an ni Bela Padilla ang iyang kritiko nga dili na siya hilabtan gumikan kay wala siya’y panahon sa pagpangaway. Nasayran nga napungot si Bela sa usa niya ka kritiko nga nipadala kaniya og mensahe og giingnan siya og “laos”. Giingnan niya ang iyang basher og
“Good morning! gising ka na ba? Sa Katotohanan."
Gipadad-an og pagkaon
Natandog si Maine Mendoza sa iyang pipila ka fans gumikan kay nagpadala gyud kini og lechon baboy sa set sa pelikulang Jack Em Popoy: The Pulis Credibles kung diin kauban niya sila si Coco Martin ug Vic Sotto. Matud pa ni Maine nga mapasalamaton siya sa iyang fans nga wala gyud mapul-i sa pagpangga kaniya.
Padayon gihapon
Naglain ang lawas ni Martin Nieverra atol sa concert nila ni Ai Ai delas Alas didto sa Atlantic City sa miaging gabii apan wala gyud nagpaghalata ang singer. Todo hataw gihapon si Martin sa iyang pagkanta sa entablado ug nagmalampuson matud pa ang maong concert.
Derek mobalik sa GMA
Niulbo ang report nga mobalik si Derek Ramsay sa GMA-7 ug matud pa duna na’y proyekto nga nagpaabot kaniya sa maong network. Kahinumdoman nga nahimong kabahin si Derek sa noon time show nga Eat Bulaga niadtong 2001 hangtud sa 2004.
Hugyaw ra
Dili basta-basta ang kasinatian ni Max Collins sa dihang nahimo siya nga presentor sa APAN Star Awards 2018 didto sa South Korea gumikan kay nahimamat gyud niya ang mga sikat nga artista sa maong nasud. Duna pud siya’y hulagway kung diin katupad niya ang sikat nga Korean star nga si Jung Hae-in nga bida sa K drama nga Something in the Rain .
Lig-on gihapon
Nakaingon si Angel Locsin wala pa gyud mahupas ang kusog nga karisma ni Maricel Soriano atubangan sa kamera. Nasayran nga kauban ni Angel si Maricel sa seryeng The General’s Daughter. Dakong garbo alang kaniya nga makauban ang diamond star sa usa ka serye.
Sarah pasok sa EB
Sukad kagahapon, gihimo na nga co-host sa Eat Bulaga si Sarah Lahbati . Nasayran nga nitikang si Sarah sa maong show niadtong Sabado isip hurado sa usa ka segment apan ubay-ubay ang nakabatyag nga angayan siya nga himuong co-host sa maong show. Mapasalamaton ang aktres nga mahimong kabahin sa maong noon time show.
Giintriga lang
Giklaro ni Angeline Quinto nga wala siya nahulga sa report nga mobalhin na si Regine Velasquez sa ABS-CBN. Gilenggua kini ni Angeline human duna’y nangintriga kaniya sa social media. Gani gipadayag sa singer nga ikalipay gyud niya og maayo nga makatrabaho niya ang giidolo niya nga singer.
Jake nakat-on na
Gipasalig ni Jake Cuenca nga lahi na ang iyang estilo kung pananglitan makauyab siya og balik. Hatagan gyud niya og igong oras ang iyang pamilya ug showbiz career kung mosulod siya sa maong butang. Dili napud siya magpalabi og gasto. "'Yung una siguro bawas gastos. Siyempre lifestyle ko medyo magastos. Siyempre 30 na ako, sabi ko 'Ma, babaguhin ko na ang structure ng financials ko.' So yun, isa yon," tsika pa ni Jake sa dihang nilugwa siya sa Magandang Buhay.
Tsismis ra
Gipamatud-an ni Neil Arci nga dili gyud tinoud ang niulbo nga istorya nga matud pa buwag na sila ni Angel Locsin. Nag-post si Neil sa iyang Instagram story kung diin nag-uban pa sila sa pagpanuroy ni Angel.