#TrabahoGarantisado

CEBU, Philippines — Pangandoy gyud sa mga kaslonon ang makabatun og makasaysayanong wedding day.

Adunay uban wala mag-apas og engrandeng wedding apan tinguha lang nila nga makaangkon og han-ay ug hapsay nga kasal.

Gawas sa wedding designers ug make-up artist, dakong aspeto sab nga angayang ikonsidera mao ang wedding coordinator.

Arun makab-ot ang tiunay nga plano ug hapsay nga dagan sa kasal, manginahanglan gyud ang kadaghanan sa ilang tabang.

Ubay ubay na nga mga pangalan sa wedding coordinators ang mipatigbabaw lukop nasud kun sila nay hisgutan.

Apan kun dinhi sa Sugbo, dili malimod nga si Carlo Abaquita maoy usa sa mga labing inila ug in-demand kanila kinsa kapin na sa 10 ka tuig nga nagsilbing wedding coordinator.

Dili na basta -basta si Carlo sa maong industriya sanglit napamatud-an na man sab niya ang iyang katakos sa propesyon nga iyang gipili.

Gawas sa mga inilang elitista ug mga personalidad sa Sugbo, ubay ubay na sab nga celebrities sa kauluhan ang nahimo niyang kliyente.

Siya maoy nangulo sa mga engagement shoot sa mga nag-unang artista sa nasud sama nila Karel Marquez didto sa Hongkong ug Bangs Garcia uban sa bana niini didto sa Tagaytay.

Mao sab nila ni Billy Crawford ug Coleen Garcia didto sa Thailand ug karong bag-o lang kang Ai-Ai delas Alas dinhi sa Sugbo.

Pagsugilon ni Carlo, nagsugod ang tanan sa dihang siya maoy gipa-organize sa kasal sa iyang kaubang empleyado kaniadto sa Perpetual Succour Hospital.

Ang maong kasinatian maoy nagbukas sa plano niyang mamahimong wedding coordinator.

“My mom is a businesswoman. She always encourages me to do my own business. She also supports me in all the things that I do. So the moment nga niingon ko niya nga mag- wedding coordinator ko then she supported me financially para maka-start og shop then the rest is history,” saysay pa niya.

Ang iyang pamilya matud pa maoy iyang inspirasyon ug sila maoy rason sa pagpanikaysikay niya matag adlaw.

Sa pagkakaron, mapasigarbuhon niyang gipaambit nga halos matag adlaw aduna siyay wedding appointments ug kasagaran niini, kun dili mag dinoble, molabaw pa sa triple ang iyang i-organize matag adlaw.

Nabantayan sab niya nga mas uso karon ang temang “classic elegant” sa mga kasal nga mao gyuy i-request sa iyang mga kliyente nga maoy mamahimong tema sa espesyal nilang adlaw.

Malipayun matod pa siya tungod kay daghan siya’g mga couple nga natabangang makab-ot ang ilang mga dream wedding.

Dako sab ang iyang pasalamat sa iyang mga team, suppliers, photographers, make- up artists, designers ug videographers nga maoy nakauban niya sa pag-establisa sa iyang pangalan dinhi sa Sugbo.

Gawas sa iyang pagka wedding coordinator, usa siya ka rehistradong nurse ug nakahuman sab siya sa iyang master’s degree major in medical surgical nursing sa Southwestern University.

Sa pagkakaron, tinguha ni Carlo nga makatungha og event specialist course sa abroad.

Malipayon sab siya’g dako sa iyang pagka wedding coordinator sanglit tungod niini, nakabiyahe siya sa mga nagkadaiyang dapit sa nasud sama sa Australia, America, Hongkong, Maldives, Singapore, Thailand, Japan ug uban pa.

Q& A

BNH: Daghan na ang mga nanggawas nga balita bahin sa mga kinasal nga nabiktima sa incompetent delivery of services sa coordinators, unsay imong ikasulti bahin niini?

Carlo: Panahon sa akong nursing days our clinical instructor taught us to present reality. If ang client magpakita gani og details nga if you think lisud i- achieve then tell them nga dili kaya para dili sad mag-expect si client. That’s presenting reality.

BNH: Unsay imong suggestions alang sa nagplanong magpakasal kun ugaling mopili og wedding coordinator?

Carlo: Three tips akong mahatag first, pangita og wedding coordinator nga naay business permit ug shop para kung naay problema naa kay maadtuan. Second, do some research, kung gihatagan ka og nindot and legit nga suppliers. And lastly, check their works.

BNH: Nganung sa imong tan-aw dugukon man gyud ka sa katawhan ug unsay labing challenging nga part ang imong nasugatan isip wedding coordinator?

Carlo: Nag-una gyud ang referral from client and suppliers. Ikaduha, ubay ubay na sad gyud mi og props for wedding, ug ang ikatulo, we always work out sa clients working budget. Every wedding is a challenge, ang pinaka challenging nga part was when I did weddings in Australia and America kay wala koy assistant nga motabang. It’s a “one man show.”