CEBU, Philippines — Mao kini ang paghulagway sa nakoronohan nga labing una nga AAA Renaissance Cebuana sa Lalawigan sa Sugbo nga si Katherine Jumapao.
Ug pinaagi sa naangkon niya nga korona, mapalapdan pa og samot sa 26 anyos nga si Katherine ang iyang adbokasiya sa pagtudlo sa mga bata sa nagkadaiyang matang sa sports ngadto sa mga barangay.
Una niya kini nga gisugdan sa Liloan, apan gumikan sa iyang kadaogan, mapakatap na kini sa nagkalain-laing dapit sa Sugbo.
‘Nindot kaayo ang feeling nga makatabang ta. Importante kaayo ang edukasyon sa tawo, kay mao kini ang kabilin nga lisod mailog. Tungod usab sa sports, ang ubang mga bata, makapadayon gyud sa ilang pag-eskwela,” matud pa niya.
Mahiligon si Kath og volleyball ug buot usab niining makatabang sa pag-promote sa women empowerment pinaagi sa iyang hilig sa paugnat sa kusog.
Nagsilbi na siya karon nga ambassadress sa Provincial Women’s Commission (PWC) ug ang programa sa edukasyon pinaagi sa sports maoy iyahang ipatigbabaw sa iyang termino.
Ang Renaissance Cebuana gihihimo sa provincial government alang sa pag- highlight sa Cebuanas isip athletic, academic, and artistic (AAA).
Dugang pa niya nga lahi gyud ang iyang pagsalmot sa maong pageant, sanglit dili kini basta-basta kumpara sa ubang beauty pageant.
Sa AAA Renaissance Cebuana, ang mga kandidata nag-agi og nagkadaiyang hugna sama sa fun run, quiz bowl ug talent night ug hangtud nga nagtigi na sila coronation night.
“Nakita man gud nako kung unsa ka lahi ang Renaissance Cebuana, maong na- convince rapud ko nila nga moapil ani”, suma pa niya Kath.
Giangkon ni Kath nga duna’y higayon nga nakasalmot siya og laing prestihiyosong indigay, sanglit nahimo siyang finalist kaniadto sa Miss Cebu 2015.
Kursong Marketing sa University of San Carlos maoy nahuman ni Kath ug nagtrabaho siya karon sa usa ka real estate company.
QandA
Banat Hugyaw: Unsa imong gibati human ka nidaog isip Renaissance Cebuana?
Kath: Wala dayon ko katoo, kay puros man pud lig-on ang tanang candidates. Dili pud lalim ang among gipang-agian maong lipay kay ko.
Banat Hugyaw: Unsa ang imong mga preparasyon sa wala paka nisalmot sa maong pageant?
Kath: Exercise lang permi, nag-study sad og maayo. Ang kanang paso, madala-dala raman pud nato.
Banat News Hugyaw: Unsay makapasuko nimo?
Kath: Wala ko’y pasensya sa mga tawong langayan.
Banat News Hugyaw: Unsay makapa-smile nimo?
Kath: Moangkon gyud ko ana, makapa-smile nako ang pagkaon ug ang pag-travel.
Banat News Hugyaw: Your goals ug dreams.
Kath: Maka-travel og daghang lugar mao gyud na akong ganahan. Makatigom og maayo aron ma-independent ko og maayo, nga dili na gyud magsalig sa ginikanan.
Banat News Hugyaw: Kon makahupot ka og dakong kantidad sa salapi unsaon nimo kini?
Kath: Ako gyud na i-share sa akong program alang sa mga bata. Sauna pa gyud na, malipay gyud ko basta makatabang ko sa ubang tawo. Kanang makita gali nimo, nga duna sila’y nakat-onan sa imong gitudlo, ug nalipay pud sila sa imong gibuhat. Nindot gyud siya pamation.
Banat News Hugyaw: Pagmintinar sa kanindot sa imong lawas?
Kath: Mahiligon ko sa pagkaon, pero kinahanglan pud ang saktong disiplina sa kaugalingon. Dili man pud nako kalimtan ang pag-workout.
Banat News Hugyaw: Alang kanimo, unsa ang imong best asset?
Kath: Seguro ang pagka-active nako sa sports, kay sa maong pamaagi naka-share pud nako sa uban ang akong skills.
Banat Hugyaw: Do you drink alcohol or smoke cigarette?
Kath: Dili ko mo-smoke, pero moinom rako occasionally.