Ang akong tahas

Ang akong kinabuhi sama sa uban adunay daghang mga pagsuway, liko-liko, usahay naa sa ubos ug usahay naa sa taas. Managlahi ang tawo sa ilang personalidad, hiyas, opinyon sa mga butang o pagsuway ug sa pamaagi paglingkawas gikan niini. Apan siguro gyud ko nga walay paborito ang Ginoo.

 Kang Dodong, ang unang hagit nga naabot kanako kadtong pag-aghat kanako sa akong igsuon nga si Eddie pagkandidato pagka-Kongresista sa Unang Distrito sa Sugbo kay dili na siya mahimong mopasubli pa tungod sa limitasyon sa mga termino. Usa kadto ka hangyo, dako kaayo kadto nga hagit kay dili baya gyud ko politiko. Nakahinumdom pa ko sa mga pulong ni Mama Pining nga nag-ingon: “Dodong if you also get yourself into politics, then perhaps that will be the time to let go of the University, your Papa’s legacy.” Dili kadto sayon aron matubag dayon. Walo ka adlaw nako ning gihinuktokan ug niduaw pa gyud ko sa lubong sa akong amahan ug inahan aron pagpangayo og giya kanila samtang akong gitimbangtimbang ang akong itubag.

Sama sa akong naandan, nag-ampo ako aron mangayo og divine intervention gikan ni Sr. Sto. Niño, Sacred Heart of Jesus ug Mama Mary. Human sa walo ka adlaw, andam nakong motubag sa hangyo. Sayod ako nga di kadto sayon, kinahanglang atubangon nako ang dangatan kon pananglitan mapildi ko. Mawad-an na ba kaha ko og pagsalig sa akong kaugalingon? Nagtoo gyud ko nga dako kini nga hagit, apan hagit kadto nga dili nako atrasan. Sa laktod nga pagkaestorya ako kadtong gidawat ug karon kabahin na sa kasaysayan.

Ang bag-ong hagit karon mao kining Centennial Celebration of the University of the Visayas, ang legasiya ni Papa Inting. Naklaro na gyud nako karon ang akong papel nga giandam sa Kahitas-an kanako.  Sa pagtaliwan ni Papa Inting niadtong 1970’s si Eddie bagito pa nga kongresista. Dihang nitaliwan na sab among inahan nga si Mama Pining niadtong 1984, si Eddie mao nay Gobernador sa Sugbo.  Masulob-on nakong gisultihan ang akong mga igsuon nga si Inday Sering ug Eddie nga matawag na gyud ming mga “ilu tapos” ug ang tahas gipasa na tanan kanamo, ang ikaduhang henerasyon. Ang maong tahas usa ka dakong hagit, ang legasiya nilang Papa ug Mama nga dugay nilang gitukod ug giampingan.

Sa edad nga 50 dihang nakaamgo ko sa katuyoan ni Papa Inting aron ako makat-on kon unsaon pagpadagan og unibersidad. Siya maoy nagpugos kanako pagtambong sa mga tigom sa Philippine Association of Colleges and Universities didto sa Manila kansang mga sakop mga inilang mga tawo sa natad sa edukasyon sa nasud.

Nabansay ko gikan nila ni Armand Fabella, Amading Dizon, Santi de la Cruz ug Francisco Dalupan, Jess Jhocson ug Oscar Mapua. Si Dr. Fely Reyes maoy nisilsil sa akong hunahuna kon unsa ka mahinungdanon ang pagpadayon sa de kalidad nga edukasyon.

Nadoble ang hagit tungod kay magselebrar usab sa ika-100 nga tuig ang The Freeman newspaper, nga gitukod sa among uyoan nga si Paulino niadtong 1919, nga akong gi- revived niadtong 1965 sa dihang nag-edad pa ko og 34. Ang igsuon niining pamantalaan nga Banat News magselebrar na usab sa Silver Anniversary niini human sa 25 ka tuig niining pagmantala karong sunod tuig. Nagpasalamat ako og dako sa Kahitas-an niining mga pagsuway ug hagit nga akong giatubang sa akong kinabuhi.  Nakasabot na ko sa kinaadman sa akong ginikanan sa mga gisulti nila kanako: “Dodong, remember this, every moment of your life is very precious and that always put your heart in your hands in dealing with your fellowman and that man by nature is ungrateful, if you can find one, he is an exception. Kindness, generosity, and gratefulness is the memory of the heart.”

Alang kang Dodong, tinuod gyud nga hinulaman lamang ang atong oras dinhi ning kalibotana, mao nga kinahanglang magpabilin kitang mapahiubsanon, tawhanon ug mobati sa uban ug mainampoon kanunay tungod kay manuktok kanato ang Kahitas-an bisan unsang orasa. Ako lang giampo nga ang mga nagsunod niining akong lindog nga iapil usab intawon ako sa inyong mga pag-ampo aron motaas-taas pa akong panaw, maayong panglawas ug makahimo pa og mga maayong butang sa kinabuhi.