“Every booking is a challenge for me. Kay lainlain nga tawo ug personalidad ang atong serbisyohan. Lainlain og gikinahanglan. Lainlain og kinaiya bahin sa oras ug serbisyo ug lainlain og vibes sa trabahoan.”
Mao kini ang paghulagway ni Rhino Deiparine sa ordinaryong hagit nga iyang naandang masugatan sa panahong mopaanyag na siya sa iyang mga kliyente.
Kapin sa 30 ka tuig na siyang nagsilbing makeup artist dinhi sa Sugbo.
Pagpaambit pa niya, usa sa mga rason kung nganung milungtad siya’g dugay sa maong industriya tungod kay wala gyud niya wad-a ang iyang pagka- professional sa iyang trabaho.
Lakip na niini ang pagka “on-time” niya perme sa events nga iyang adtoan ug dili usab niya wad-on ang VIP treatment sa tanan niya nga kliyente.
“Sa akong 33 years of doing my job, all I wanted was to learn and explore the magic of makeup. It was never about the money nor was it ever about the fame. Ang akoa ra gyud nga gusto is I can do makeup. Learn from it. Share my knowledge and keep doing it as long as my body and my mind will allow me,” matud pa niya.
Bata pa lamang si Rhino, nagpakita na siya sa iyang abilidad ug dakong gusto sa pag-make up sa iyang mga kaila.
Gani nakahinumdum pa siya nga sa maong panahon, kanunay niyang pugson ang iyang Mama ug igsuong babaye aron maoy iyang paguwapahan..
Hangtud nga nahimamat niya ang tawong gikonsiderar niya nga iyang mentor sa pagpaanyag, si Gene Exotica.
Sa kanunay niyang pag-uban uban sa maong tawo kaniadto, didto na gyud hingpit nga misantop sa iyang alimpatakan nga ang pagka -makeup artist gyud maoy gusto niyang himuon hangtud sa hangtud.
Ang maong higayun nahimong damgo alang kaniya nga hinay hinay nga nanalinsing hangtud nga kini namunga sa paglabay pa sa mga katuigan.
Di na maihap pa ang mga tawong nahimo na niyang mga kliyente nga kasagaran kanila nakauyon gyud sa iyang obra.
Pipila sa mga personalidad nga giisip niyang mas nakapalambo pa sa iyang pagka -make up artist nga giartehan niya mao silang Maja Salvador, Kim Chiu, Maricar Reyes, Yeng Constantino, Gerald Anderson, Gabby Concepcion , Coco Martin, Manny ug Jinky Pacquiao, Madame Malou Santos, Amparito Lhuillier ug uban pa.
Apan matud pa, usa sa dili niya malimtan nga sikat nga kliyente mao si Coco Martin tungod kay human sa show sa nahisgutang aktor didto sa Las Vegas, nibalik gayud kini kaniya didto sa backstage nga nagpasalamat uban pa sa pagakus kaniya.
Dili sab niya malimtan ang iyang kliyente nga si Manny Pacquiao tungod sa pagka -generous tipper niini.
Sa klase sa mga kliyente nga nabatunan ni Rhino, makaingon gyud ang kadaghanan nga usa siya sa mga tinamod ug gihangad nga makeup artist sa Sugbo.
Gani mapasigarbuhon usab niyang gipaambit nga usa siya ka lisensyadong make-up artist sa State of California.
Dinhi sa Sugbo, miyembro sab siya sa MUAC-C o kun Make-up Artist Club of Cebu kung diin siya maoy Vice-President for External sa maong kahugpungan.
Gipaambit sab niya ang iyang pag idolo sa sikat nga mga make-up artist sa tibuok kalibutan nga silang Way Bandy, Kevin Aucoin, Jemma Kidd, Pat Mcgrath, Bobbi Brown, Francois Nars ug Max Factor.
Sila matud pa ang iyang giisip nga mga makeup artist nga maoy nakapalapad sa pagpangarte gikan sa “old forms of make-ups” ngadto na sa pagpaila og mga bag-ong gamit sa pagpangarte nga may lain lain nang textures ug color niini.
Dugang pa niya, ang iyang pagka-makeup artist maoy hingpit nga naghulma sa iyang pagkatawo .
Sa kasamtangang panahon, mapasigarbuhon niyang gipaambit nga left and right ang iyang bookings ug halos dili na sab maihap nga wedding appointments ang gisanong niya.
Apan ang labing importante niini matud pa mao ang saktong pagbahig sa iyang oras.
“The fact that I’m still here doing what I want and love to do is enough recognition. For as long as my clients still need me and want me, I’m good. Make up for me is my life. Thank you sa mga clients who are now very close friends and more like family. Clients nga akong giserbisyohan gikan pa pag elementary school activities hangtud sa prom, ngadto na sa kasal ug karon sa ila nang mga anak,” nagkanayon si Rhino.