CEBU, Philippines — Suma sa panultihon nga “walay kumo sa pagsuway”, maingon nga wala gyu’y mawala sa usa ka binuhat kon suwayan ang mga butang nga gusto gyud nga buhaton. Kun makita nimo nga aduna kay maayo nga mapupo niini, buhaton gyud kini nimo pinaagi sa pagsuway.
Mao kini ang dagan sa istorya sa 22 anyos nga nahimong produkto sa Sinulog Idol Season 9 kinsa naggikan sa Barangay Labangon nga si Jaymar Ostria.
“Suwayan nako ang mga butang nga gusto nako buhaton. I want to try and I want to challenge myself”, suma pa ni Jaymar.
Sama nalang sa pagsugod niya og pagpakita sa iyang katakus nga siya lamang matud pa ang nakadiskubre.
Otso anyos pa lang si Jaymar sa dihang nahibaw-an sa kadaghanan nga kamao siya mokanta. Tungod kay hilig niya nga sundon ang mga tingog sa mga naila nga singer ug kay dali sab siya makakuha og tono sa usa ka kanta, nabatyagan sa iyang pamilya nga nindot ang timbre sa iyang tingog.
“Grade 2 ko katong nakahibawo sila nga magkanta-kanta ko. Ang naka-weird kay Celine Dion nga kanta akong kantahon”, suma pa niya.
Gipaambit ni Jaymar nga silang tanan sa ilang pamilya kamao mokanta apan dili tanan adunay maayo nga tingog. Dugang pa niya nga mas mipatigbabaw sa ilang dugo ang kamaayo mosayaw.
Matud pa ni Jaymar nagsugod sab ang iyang pagmahal sa pagsayaw tungod sa impluwensiya gikan sa iyang igsuon nga si Michael Joseph kinsa myembro sa Type 1 Dance Company.
Bisan pa man nga pokus na siya sa pagsayaw tungod sa iyang kawili nga mahisama sa iyang igsuon, dili gihapon niya kalimtan ang pagkanta matag adlaw tungod kay alang kaniya, ang pagkanta ang labing una nga talento nga iyang nakamahuan.
Gani, niadtong 12 anyos siya, misalmot siya sa labing una nga singing contest sa usa ka sityo sa ilang dapit sa Barangay Labangon.
“Niapil ko ato kay niana man akong migo nga 200 daw ang daog mao to nga niapil ko. Try lang gud”, asoy pa niya.
Bisan pa man og dili pangsangka sa contest ang iyang gikanta niadtong higayona, napilian gihapon isip mananaug sa maong kompetisyon.
“Na-champion ko ato human ato kay wala nako niapil og balik”, suma pa ni Jaymar.
Tuod man, bisan og nakahukom siya kaniadto nga dili na sundan ang maong pagsalmot sa kompetisyon, apan maingon nga gitagana gyud alang kaniya mao nga mosalmot pagbalik tungod kay bisan og daghan na ang panghitabo nga iyang nasinati, gitagana gyud alang kaniya ang makasalmot sa tinuig nga Sinulog Idol.
“Sa una, nakakita nako sa contest and naa koy plano ato moapil pero wala lang koy guts ato mao to nga naa koy schoolmate sa una nga ni-invite nako nga moapil ko pero nagduha-duha gihapon ko but at the end kay niapil gihapon ko kay na-depress ko ato sa love”, asoy pa ni Jaymar.
Sa maong rason, midayon gyud siya sa apil sa audition sa miaging tuig.
“First time nako nga moapil og prestigious competition ug nisuway ra sab gyud ko kung unsa ang resulta but it’s very challenging for me gyud kay first day pa lang sa audition daghan na kaayo maayo nga singers pero wala ko mag-expect og call back gyud ato”, ambit pa niya.
Dakong kakugang na lamang ni Jaymar nga aduna nay ni-tag kaniya sa usa ka post kun diin nakasulod siya isip finalist sa Sinulog Idol.
“Usa gyud ni sa proudest moment sa akong kinabuhi ang maapil ko sa Top 12. Dako man gud kaayo nga competition ang Sinulog Idol and they are looking for the best singers to bring out the best performers diri sa Cebu and I guess I am one of the chosen few nga naswertehan. Despite sa akong rason nganong niapil ko, mura og gihatagan ko og chance para makapangita og laing mas bug-at nga rason nganong naa ko ani nga competition”, siya nagkanayun.
Sa dagan na sa kompetisyon, buot ug tumong na ni Jaymar nga mapakita kun unsa ang naa niya nga mahimo sab niya nga ikapasigarbo sa kadaghanan.
“One big lesson is once you'll join any competition you should give your very best and sa Sinulog Idol is katong I forgot the lyrics lesson sa usa ka kanta, makaingon ko nga memorable pud to siya”, paambit nga komedya ni Jaymar.
Mapasalamaton gihapon si Jaymar sa tanang mga nagpasiugda sa Sinulog Idol tungod kay bisan og suway-suway lang ang iyang maong pag-apil, nahatagan gihapon siya og kahigayunan nga mapakita kun unsa ang katakus nga iyang naangkon.
“Thank you gyud sa tanan nga nagpaluyo sa Sinulog Idol. I had a very memorable and happy experience. Gawas nga nakakita ko og bag-o nga friends, nakakita sab ko og bag-o nga pamilya. Daghan kaayo ko og nakat-unan tungod lang sa Sinulog Idol. Without Sinulog Idol, focus ra gyud siguro kaayo ko sa akong work. Through this show, nakatabang kaayo ni nako to help me grow as a person and as a performer mao nga og naa gani aspirant nga mahimong finalist sa Sinulog Idol, dapat magpasalamat sab ka kay you will be very blessed with so much learnings nga dili makuha sa uban competitions”, pagtapos pa ni Jaymar.