Gibutyag sa Tawag ng Tanghalan (TNT) Boys nga sila si Francis Concepcion, Mackie Empuerto ug Kiefer Sanchez nga dili gyud mahitabo nga magsinapaway sila sa ilang pag-perform sa entablado. Matud pa nga duna gyud sila’y meeting sa backstage sa dili pa sila mokanta aron tulin gyud ang ilang performance.
Zeus ipares kang Kakai
Ang Hashtags member nga si Zeus Collins maoy usa sa makapares ni Kakai Bautista sa pelikullang Wander Bra. Nagpanikad na og maayo si Kakai sa maong proyekto gumikan kay mao kini ang unang higayon nga makabaton siya og superhero role.
Kever sa isyu
Igo na lang mokatawa si Ronnie Alonte kung banhawon ang isyu nga nag-link sa iyang pangalan ngadto sa komedyanteng TV host nga si Vice Ganda. Suma pa ni Ronnie nga suod niya nga higala si Vice busa dili ra siya magpaapekto sa mga intriga.
Bag-ong konsepto
Hugtanong gihimakak sa kampo ni Alden Richards nga matud pa susama og konsepto sa Pedro Penduko ang upcoming series sa aktor sa GMA-7 nga Victor Magtanggol. Wala pa’y ideya ang aktor kung kinsa ang makauban niya sa maong proyekto.
Kris pasok sa The Cure
Gipasulod sa seryeng The Cure si Kris Bernal. Ang maong serye gibidahan nila ni Jennylyn Mercado ug Tom Rodriguez. Tak-om lang ang kampo sa maong serye kalabot sa tsika nga matud pa nga wala kini mo-click.
Makighimamat sa Pinoy fans
Motikang dinhi sa nasud ang sikat nga Korean stars sila si Sandara Park ug Nam Joo Hyuk aron makighimamat sa ilang fans karong July 29, 2018 sa Mall of Asia Arena. Tipik usab kini sa promosyon sa giindorso nila nga clothing line.
Misabay sa uso
Tsika pa ni Alex Gonzaga nga nalingaw ra siya sa vlogging gumikan kay usa kini sa iyang pamaagi nga mailhan niya og samot ang iyang kaugalingon. Gihimo niya og inspirasyon ang iyang subscribers. Gawas kang Alex, pipila na ka mga artista nga nisulod sa digital world, kini sama nila ni Judy Ann Santos, Bianca Gonzales, Yeng Constantino, Alexa Ilacad, ug Andrea Brillantes.
Sige og larga
Samtang nagpaabot si Gabby Concepcion sa iyang umaabot project sa GMA-7, ang mga out-of-town show maoy iyang gikabisihan. Mapasalamaton kaayo si Gabby sa GMA-7 gumikan kay wala gyud siya pasagdi.
Big stars
Niulbo ang taho nga matud pa mag-uban sa usa ka pelikula ang Viva talents nga sila si Anne Curtis ug Sarah Geronimo. Giingong taod-taod na ang maong plano apan dili magkatakdo ang mga schedule sa maong duha ka mga artista.
Krista nakagawas na
Nakagawas na sa Valenzuela City Jail ang starlet nga si Krista Miller human napriso niadtong 2016 human kini nalambigit sa ginadiling drugas. Ang pag-atiman sa iyang mga anak maoy hatagan og pagtagad ni Krista karong panahona.