CEBU, Philippines – Giklaro ni Paul Salas nga nananghid siya og tarong sa ABS-CBN sa wala pa siya nibiya ug nibalik sa GMA7. Matud niya wala siya nangluod sa Kapamilya Network, ganahan lang gyud siya mu-arte busa nanimpad siya sa Kapuso Network diin siya unang nagsugod pinaagi sa Starstruck Kids kauban sila si Bea Binene ug Miguel Tanfelix. Pormal na nga mipirma og kontrata sa GMA7 si Paul, diin co-manage siya sa PPL Entertainment diin usab mahisakop iyang mga uyuan nga sila si Arthur Solinap, Carlo Gonzales ug Dingdong Dantes.
Maghimo’g Bata
Plano na sa magtiayong Solenn Heussaff ug Nico Bolzico ang makabaton og anak sunod tuig. Pero komedya ni Solenn dili siya mu-undang sa showbiz alang niini, sanglit makaya ra matud pa ang paghimo og bata sa gabii. Malipayon si Solenn sa pagmabdos na sa iyang higala nga si Heart Evangelista. Maong ganahan na sab siya nga makaanak aron magkabarkada ra sab unya ilang mga liwat.
Dili pa magminyo
Dili pa andam magpakasal nila ni Dennis Trillo ug Jennylyn Mercado. Suma pa sa aktres, dugay pa kini mahitabo sanglit daghan pa sila og plano sa usa'g-usa. Bag-ohay lang nag-viral ang ilang sweet photos ni Dennis didto sa Balesin, hinungdan nga napangutana ang aktres kabahin sa kasal.
Hugyaw si Angel
Gidayeg ni Diamond Star Maricel Soriano si Angel Locsin, kinsa ang iyang umaabot nga co-star sa iyang comeback teleserye pinaagi sa ABS-CBN nga adunay ulohan, “The General’s Daughter.” “Mahusay yung bata,” suma pa ni Maricel, ug midugang nga gwapa sab ang nahisgutan. Lig-on sab gyud matud pa ang cast niini nga maglakip nila ni Janice de Belen, Eula Valdez ug Ryza Cenon.
Gimingaw Na
Gimingaw na si Bea Alonzo nga makatrabaho ang iyang leading man kaniadto nga si John Lloyd Cruz. Sa iyang pag-guest sa Tonight With Boy Abunda niining bag-o lang, niuyon si Bea sa pamahayag ni Abunda nga may mga actor gyud nga lahi ang inyong koneksyon sa usa'g-usa kon magkatrabaho na sa pelikula.
Walay sala si Melissa
Gipanalipdan ni Rocco Nacino ang iyang uyab nga volleyball star nga si Melissa Gohing. Si Melissa man gud ang gibasul sa usa ka netizen nganong gipapas ni Rocco ang hulagway nila ni Sanya Lopez sa Instagram account niini, ug hingpit gyud nga gi-unfollow. Suma pa ni Rocco, siya mismo maoy nihukom niini isip respeto sa iyang hinigugma ug walay sala si Melissa.