Lingaw apan minos og gasto

CEBU, Philippines – Padayon nga gipahimuslan sa mga tinun-an ang nahibiling adlaw  nga wala’y klase sa dili pa  hingpit sugdan  ang pagbukas og balik sa klase sunod buwan.

Taas-taas pa ang adlaw, busa pipila ka mga tinun-an ang naghunahuna kon unsa ang mahimo nilang buhaton aron mas ma-enjoy og maayo  ang ilang bakasyon.

Apan pipila kanato ang dili kaayo mogasto og dako sanglit nagdaginot sila og maayo.

Sa dili ganahan nga mogasto og maayo karong panahona, mahimo ra man nga mag-enjoy.

Puwede ra gyud kaayo malingaw karong panahona nga dili na kinahanglan nga mabuslot ang inyong bulsa.

Mao kini ang pipila ka tips  nga akong nahipos  alang sa minos nga pagasto alang sa nahibilin nga mga adlaw sa bakasyon sa mga estudyante.

TIPS:

• Kon mahilig mo sa pagkaon. Pangadto mo sa paborito ninyo nga  baratohon nga kan-anan. Apan kon kapoyan namo nga molakaw pa og layo, pag-food trip na lang mo sa inyong balay  aron kamo gyud ang mangunay sa pagluto sa  pagkaon.  Uso usab karong panahona ang gitawag nga boodle fight. Magtampo-tampo lang gud ang mag-barkada, para dili kaayo bug-at sa gasto.

• Dunay uban kanato nga gusto ra magyaka sa balay. Kay high-tech na man kaayo karong panahona, kumustaha na lang ang inyong mga higala pinaagi sa inyong mga social media account.

•Pag-movie marathon na lang mo sa inyo, magluto mo og pangsima-sima, payts na!

• Bisita sa  panimalay sa inyong higala ug todo bonding samtang wala pa’y klase.

• Kon duna’y duol nga park sa inyo, puwede kaayo mag-picnic.

• Maka-relax usab  kon  magpa-bukid  mo.