CEBU, Philippines — Ang taas nga pasensya ug ang pagkamapaubsanon maoy hinagiban sa komedyanteng aktor nga si Empoy Marquez nga nagpabilin siya sa industriya karong panahona.
“Salamat sa magandang career, mula noong 2003, hindi po ako pinabayaan ni Lord. Continuous po ‘yun. Di po ako nawalan ng trabaho kahit na lumipat ako ng Channel 7, Channel 5 at bumalik ako ng Channel 2,” saysay pa ni Empoy ngadto sa mga sakop sa Cebu Entertainment Press atol sa presscon nga gidumala ni Ms. Josie Pereyra sa JSP Ads & Promotions.
Nitikang si Empoy dinhi sa Sugbo atol sa Sinulog ug siya ang nisakay sa float sa usa ka pawnshop.
Nailhan kaniadto si Empoy sukad siya nidaog sa Mr. Suave segment sa noontime show sa ABS-CBN kaniadto nga Magandang Tanghali Bayan.
Sa miaging tuig, nikisaw og samot ang iyang pangalan gumikan sa pelikula nga gi-produce ni Piolo Pascual nga “Kita Kita” diin nakapares niya si Alessandra de Rossi.
“Malaki ang pasasalamat ko kay Mr, Piolo, malaking blessing talaga ang “Kita Kita” at nakaka-proud dahil kasama ko si Alessandra,” matud pa ni Empoy.
Tsika pa ni Empoy nga komportable ra gyud sila ni Alessandra sa usag-usa busa tulin ra jud kaayo ang dagan sa shooting sa maong pelikula.
“Para lang kaming naglalaro, walang ilangan at sobrang saya sa set ,” hirit pa niya.
Matud pa niya nga duna’y bug-at nga emosyon ang gipalugwa niya sa maong pelikula busa mapasalamaton siya nga nabatyagan gyud kini sa publiko.
“Kilala ako bilang komedyante, malaking bagay na sa akin, na magseryoso minsan sa ilang eksena. Nasa isip mo kasi kung ano ang dapat mong gawin, para ma-convince yung tao na nanonood sayo,” pasabot pa ni Empoy.
Nagbaha ang mga endorsement ni Empoy karong panahona ug naggumikan kini sa “Kita Kita”.
Aduna pud siya’y umaabot nga pelikula sa Star Cinema uban kang Zanjoe Marudo nga nag-ulohan og “Kusina Kings” diin ang Cebuano director nga si Victor Villanueva maoy modumala niini. Kahinumdoman nga si Villanueva maoy direktor kaniadto sa Patay Na Si Hesus.
Gawas sa maong proyekto, malakip pud siya sa usa ka serye sa ABS-CBN diin makauban gihapon niya si Alessandra ingon man usab sila si Piolo ug Arci Muñoz .
Wala na siya mohatag og lapad nga detalye sa maong serye apan gipasalig niya sa iyang fans nga malingaw gyud sila sa dagan sa istorya niini.