CEBU, Philippines — Nagkatagbo ug nagkahinabi ang duha ka Darna actresses nga silang Liza Soberano ug Angel Locsin atol sa ABS-CBN's 2017 Just Love Christmas Special didto sa Araneta Coliseum niadtong Miyerkules. Sa talagsaong higayon nakit-an ang duha nga nagtsika sa backstage. Si Liza ang nihulip ni Angel sa paglupad isip Darna sa upcoming movie adaptation sa Star Cinema sa pinoy superhero movie.
Pasok sa top 10
Nalakip sa top 10 Google Most Searched Movies in 2017 ang duha ka Filipino movies nga 100 Tula Para Kay Stella nga gibidahan nilang JC Santos ug Bela Padilla ug Kita Kita diin silang Alessandra de Rossi ug Empoy ang bida. Laing pasok mao ang Beauty and the Beast, Wonder Woman, Justice League, Fast and Furious 8, Fifty Shades Darker, Logan, It, ug Moana.
Next Dingdong Dantes?
Gibutyag sa Kapuso actor nga si Ruru Madrid nga ihatag na niya sa mga tawo ang kahigayonan nga mohukom kun siya ba gyud ang mosunod ni Dingdong Dantes sa GMA network human sila nag-tie sa Kapuso Primetime King isip Best Drama Actor award sa 31st Star Awards for TV sa Philippine Movie Press Club. "Mas okay po na ibang tao na lang ang magsabi," suma pa niini.
Mipakilig sa mga kauban
Nipakilig sa tanang nitunga sa ABS-CBN’s Christmas Special ang celebrity couple nga silang Sarah Geronimo ug Matteo Guidicelli sa dihang nag-uban kini sa stage kauban ang laing Kapamilya stars. Mas gikilig ang mga tawo sa dihang gipugos nilang Kathryn Bernardo ug Daniel Padilla nga magtapad ang duha atol sa all-star production number.
Gisurprisa ni Barbie
Nalipay matud pa ang aktor nga si Jak Roberto sa gihimong birthday surprise sa rumored girlfriend niini nga si Barbie Forteza. Wala matud pa magdahom ang aktor nga moabot si Barbie didto sa Tagaytay diin gipahigayon ang iyahang taping sa weekly drama sa GMA-7 nga Tadhana. Nagpasalamat sab ang aktor sa production staff sa paghatag kaniya og surprisa.
Managlahi og estorya
Giklaro sa aktor nga si Gabby Concepcion nga dili tinuod nga second choice lang si Robin Padilla sa mahimong leading man ni Sharon Cuneta sa pelikulang Unexpectedly Yours sa Star Cinema. Dugang pa sa aktor, managlahi og estorya sa nahisgotang pelikula ang pagahimuon unta nilang Reunion Movie sa Megastar. Kahinumdoman nga gibalibaran ni Gabby ang gitanyag nga pelikula nila sa ex-wife nga si Sharon tungod sa pagkabusy niini sa Ika-6 Na Utos.
Nagkatapok
Nipahigayon og grand reunion ang former That’s Entertainment stars nga silang Piolo Pascual, Jean Garcia, Ruffa Gutierrez, Ian Veneracion, Karla Estrada, ug Vina Morales. Gi-upload sa social media ang ilahang mga hulagway ug gikalipay kini sa '80s ug '90s fans. Ang That’s Entertainment usa ka variety show diin ang nipanaw nga si German “Kuya Germs” Moreno nagdumala ug host niini.
Gipangandaman gyud
Giasoy ni Liza Soberano nga nipahigayon sila og Wushu trainings sa wala pa sila nagsugod sa taping sa gibidahang action-fantasy series nga Bagani. Nagpasalamat ang aktres sa nindot nga feedback sa upcoming serye human sa opisyal nga pagpaila sa mga casts niini sa nahitabong trade event sa ABS-CBN.
No rush
Gipaambit sa Kapamilya actress Iza Calzado nga sunod tuig na sila magpakasal sa fiancé nga si Ben Wintle kini tungod kay buot pa siya mobuhat og usa ka serye sa dili pa magpahigot. Bag-o lang na-engaged ang aktres apan wala pa kini nagdali nga makasal.
Lahi ra diay
Dakong dungog alang ni Joross Gamboa nga ikumpara ang gibidahang pelikula nga Deadma Walking ngadto sa award winning gay-themed film nga Die Beautiful nga mipasikat sa aktor nga si Paolo Ballesteros. Daghan ang nag-ingon nga magkaparehas og estorya ang duha ka pelikula apan kusganon kining gihimakak sa Kapamilya actor.Ang Deadma Walking base sa Carlos Palanca award-winning story ug lakip sa Metro Manila Film Festival entries.
Tuig ni Xian
Gibutyag sa aktor nga si Xian Lim nga mabulokon ang iyahang 2017 gumikan kay daghan siyang nadawat nga blessings katong tuiga isip aktor. Gipasidunggan sa ikatulong higayon ang aktor sa iyahang performance sa pelikulang All About Her nga gibidahan nilang Angel Locsin ug Vilma Santos.
Fangirl moment
Gibayaw sa kalipay ang singer nga si Rachelle Ann Go human personal niya nga nakahinabi ug gikauban sa usa ka hulagway ang Hollywood star nga si Emma Stone kinsa nitan-aw sa musical nga Hamilton Victoria Palace Theater didto sa London.Gidala ni Rachelle sa Hamilton ang karakter ni Eliza Schuyler Hamilton, asawa sa founding father sa America nga si Alexander Hamilton. (BANAT NEWS)