Arci hindi apektado sa pamimintas sa bagong retokeng mukha!

Naging kontrobersyal si Arci Muñoz sa social media dahil usap-usapan ang umano’y pagpaparetoke ng aktres sa kanyang mukha at ilang bahagi daw ng katawan. “It’s my life, my rules. I’m just so amazed that they gave so much time. They give so much time and effort para mag-judge ng other people” bungad ni Arci.

Hindi naman itinanggi ng dalaga na nagparetoke talaga siya upang mas lalong gumanda. “Deny? No, never, what’s wrong with that? As if naman I committed a crime,” giit ng aktres.

Para kay Arci ay wala na siyang pakialam sa mga taong nagbibitaw ng masasamang salita tungkol sa kanyang pagpaparetoke. Hindi na raw iniintindi ng sexy actress ang mga pambabatikos at pangungutya mula sa kanyang bashers lalo na sa social media. “I just really don’t give a… you know it already. Wala na talaga ako masabi but I don’t know how to say it pero I don’t give a shit. Why don’t you look at yourself for once, ‘yun lang naman ‘yung sa akin,” pagtatapos ng aktres.

Sa ngayon ay regular na napapanood si Arci sa teleseryeng Ikaw Lang Ang Iibigin bilang pinakabagong bida kasama nina Kim Chiu at Gerald Anderson. Bukod sa nasabing serye ay kabi-kabila rin ang shows ng dalaga kasama ng kanyang bandang Philia.

Ikinumpara sa Emmy’s Zanjoe hindi umaasa sa magiging gf!

Wala pa ring bagong kasintahan si Zanjoe Marudo hanggang ngayon. Matatandaang si Bea Alonzo pa ang huling nakarelasyon ng aktor na tumagal nang mahigit limang taon.

Napababalitang si Bela Padilla umano ang bagong nililigawan ni Zanjoe. Nagkatambal ang dalawa sa teleseryeng My Dear Heart na nagtapos ilang buwan na ang nakalilipas.

Ayon kay Zanjoe ay nakahanda naman na siyang muling umibig sa kasalukuyan. “Handa naman ako, anytime handa ako. Parang Emmy’s (international award) lang ‘yan, ‘pag ‘di mo inaasahan dumarating,” makahulugang pahayag ni Zanjoe.

Kamakailan ay nakakuha ng nominasyon ang aktor sa International Emmy Awards para sa kanyang natatanging pagganap sa isang episode ng Maalaala Mo Kaya. Hindi raw makapaniwala si Zanjoe nang mabalitaan ang tungkol sa kanyang international nomination. “Masayang-masaya siyempre, hindi ko expected ‘yung nomination. Isang malaking blessing ‘yung para sa akin. Sa totoo lang hindi ko inaasahan ‘yon. Minsan gano’n eh, kapag hindi mo iniisip binibigla ka na lang, kaya salamat,” nakangiting pahayag ng binata.

Ngayon ay abala si Zanjoe para sa shooting ng pelikulang Fallback kung saan kasamang magbibida ng aktor sina Rhian Ramos at Daniel Matsunaga.