Aktor gustong kumalas sa ka-loveteam!

PIK: Pursigido si Ms. Baby Go ng BG Films na lalong pabonggahin ang kanyang produksyon ngayong taon. Matagal na raw siyang nakilala sa magagandang indie films na nagawa niya, kaya gusto na niyang pasukin ang mainstream. Kilala at magagaling na direktor naman ang nagdidirek sa mga ginagawa niyang indie films, pero ngayon ay mga malalaking artista na raw ang kukunin niya at pinaghahandaan na nila ito.

May malaking project daw silang gagawin kung saan ilang kilala at magaling na artista ang bibida. Si direk Joel Lamangan daw ang magdidirek. Kaya lang, hindi raw muna puwedeng i-announce kung sino ang. Isasali raw nila ang pelikulang ito sa Metro Manila Film Festival (MMFF)

PAK: Lumalala na raw ang hidwaan ng sikat na magka-loveteam dahil matagal na silang hindi okay. Minsan ay nakikita na raw sa programang nilalabasan nila ang alitan nila.

Totoo ba ‘yung narinig pa naming kinausap na raw ni aktor ang management group niya kung kailan tatapusin ang lovetean nila ng sikat ding aktres dahil gusto na niyang rumaket nang solo?

Minsan daw kasi ay nakakaraket silang magkasama out of town at nakakarating kay aktor ang reklamo ng organizers sa attitude ng aktres. Nadadamay daw siya dahil wala namang mairereklamo ang organizers sa kabaitan ng aktor.

Huwag na raw tayong magtaka kapag nabalitaan nating nagkanya-kanya na sila ng career.

BOOM: As of presstime, wala pang inilabas na bagong statement ang Binibining Pilipinas Charities, Inc. kaugnay sa status ngayon ni Bb. Pilipinas Intercontinental Katarina Rodriguez.

Kamakalawa ay naglabas ng statement ang BPCI at hinihintay daw nila ang resignation ni Katarina. Pero naglabas naman ng pahayag si Katarina na wala siyang balak mag-resign.

Ang lumalabas na kuwento, ang mga taga-Binibini mismo ang gustong tanggalin siya dahil sa naglalabasang sexy pictorials daw niya sa FHM. Meron din yatang sexy pictorials ang beauty queen sa Rogue magazine, at matagal na itong hindi puwede sa Binibining Pilipinas. Para ma-save na lang daw sa kahihiyan si Katarina, palalabasin na lang na nag-resign ito.

Pero wala pa tayong nakuhang latest development sa ngayon dahil may naririnig din kaming tuloy pa rin siya sa Binibini.

Kung sakaling matutuloy ang pagtanggal sa kanya sa Binibini, ang first runner-up na si Charmaine Elima raw ang ipapalit.

Narinig din naming hinihintay lang daw ni Charmaine ang naturang announcement at tatanggihan daw niya ito. Balak kasi nitong sumali uli next year dahil target niya talaga ang Miss Universe crown.