CEBU, Philippines - Gisaway pag-ayo sa film director nga si Jun Lana ang mga tawo nga mahiligon kaayo motan-aw og mga pelikula pinaagi sa pirated copies.
Si Direk Jun maoy nagama sa pelikula nila ni Janella Salvador ug Elmo Magalona nga My Fairy Tail Love Story (MFTLS).
Gihulagway niya nga “idiots” ang mga tawo nga proud kaayo nga pirated copy ang ilang gitan-aw.
"Pag nanood kayo ng pirated copy ng isang movie, wag nyo na ipagyabang tas itatag nyo pa at ikocongrats ang filmmakers. Idiots,” tweet pa ni Direk Jun.
Nasayran nga mapungot gyud si Direk Jun sa mga pirata ilabi na nga nabiktima na pud niini ang pelikula niya nga Die Beautiful sa miaging tuig.
P110M sa unang adlaw sa Pilipinas
Gipistahan og maayo sa mga Pinoy ang international movie nga Fast and Furious 8 nga gibidahan nila ni Vin Diesel ug Dwayne Johnson.
Nakahipos kini og P110 million sa unang adlaw nga pagpasalida niini dinhi sa nasud.
Niabot usab ngadto sa $532.5 -million ang kita niini worldwide pagbukas niini sa mga sinehan.
Tingog ni Dennis
Si Dennis Trillo ang modala sa tingog sa Korean actor nga si Gong Yoo sa Tagalized version sa pelikulang Train to Busan.
Kahinumdoman nga puwerting sikata sa maong pelikula niadtong September 2016.
Sa iyang Instagram account, gipakita ni Dennis ang hulagway
atol sa dubbing session.
Gisuwat usab ni Dennis ang mensahe nga, "I'm a Tagalizer!". (Sanden J. Anadia)
Sarah or Kathryn isip San Cai?
Niulbo karon ang hungihong nga nalakip ang pangalan nila ni Sarah Geronimo ug Kathryn Bernardo sa mga gipilian aron modala isip Shan Cai (Barbie Xu) kun madayon ang plano sa ABS-CBN nga himoan og Pinoy version ang Meteor Garden.
Pipila usab ka mga aktor ang gipilian sa posibleng modala sa karakter nila ni Jerry Yan, Vic Zhou, Vaness Wu ug Ken Chu. Kini naglangkob nila ni James Reid, Enrique Gil ,Sam Concepcion ug Daniel Padilla.
Taod-taod na ang tsika nga himoan og Pinoy remake ang Meteor Garden apan kalit lang kini nahilom. (BANAT NEWS)