Kalampusan nga gasa sa Musika

CEBU, Philippines - Nagkadaghan ang iyang mga gig,  mao kini ang usa sa mga naangkon sa lumad nga taga Jagna, Bohol nga si Venice June Corsino sa dihang  nahimo siya nga  finalist sa Cebu Pop Music Festival niadtong tuig 2016.

Matud pa ni Venice nga nikisaw gyud ang iyang pangalan sa ilang dapit tungod sa maong kompetisyon.

Bisag wala  man tuod gihatag ang kahigayonan kaniya nga modaug sa maong prestihiyosong kompetisyon kaniadto, mapasalamaton siya og dako sa Cebu Pop nga gipangamahanan ni Talisay City Mayor Eduardo Gullas  gumikan kay kini man  maoy nagbukas kaniya sa daghang mga oportunidad nga naangkon na niya sa  iyahang pagka-music lover.

Ang awit nga "Kinaiyahang Matahum" ubos sa Environmental Category maoy entry ni Venice sa Cebu Pop nga maoy nagdala kaniya isip finalist sa maong kompetisyon niadtong tuig 2016.

Siya ra usab maoy nahimong interpreter sa maong awit nga iyang gitagik.  Gawas sa pagkalakip  niya sa  Cebu Pop, makadaghan na sab siyang nahimong kampiyon sa mga nagkadaiyang vocal solo singing competition sa mga nagkalain-laing lugar sa Bohol.

Apan mas mipatigbabaw usab niya karon ang iyang pagkamahiligon sa pag-compose og mga awit.

Daghan na sab siya'g kasinatian isip tigtagik og mga awit.  Mapasigarbuhong gipaambit ni Venice nga dakog gikatabang kaniya ang musika sanglit mao man kini ang hinungdan kun nganung nakab-ot niya ang usa sa labing dakong damgo nga dugay na niyang gustong maangkon---ang mamahimong usa ka nurse.

Gani matud niya nga adunay mga higayon kaniadto nga maglisod siya ug ang iyang pamilya sa pagsagubang sa mga balayrunon sa iyang pagtungha maong nangita siya’g paagi  nga makakuwarta  aron makasuporta sa iyang pag-eskuwela.

Hinungdan nga nakahukom siya kaniadto sa pagsalmot og mga nagkadaiyang singing and song writing contest.

Ug tuod man, kapila mopabor kaniya ang higayun gumikan kay kanunay man sab siyang modaug niini ug sa maong higayun, hinay-hinay niyang mabayaran ang iyang mga balayrunon sa eskwelahan .

Bata pa lamang mahiligon na gyud si  Venice sa musika sanglit mao man sab kini ang iyang namatngunan gikan sa iyang mga ginikanan nga aduna pu’y  dakong paghigugma sa  musika. Matud niya nga hilig gyud niyang sundugon ang mga awit kaniadto nga iyang madunggan hangtud nga mamemorya na kini .

Q and A

BNH: Giunsa nimo pagsulod ang  kalibutan sa musika?

Venice: Nagsugod gyud ang tanan when I was 5 years old, kaniadtong nagsige pako og kanta sa simbahan as choir member and psalmist. I studied playing guitar and piano ug niapil dayon ko og mga  singing contest sa Bohol.

BNH: Nganong gihigugma nimo ang musika?

Venice: Mapadayag man gyud nako ang akong gibati pinaagi sa pagkanta ug pagsuwat og kanta. Maka-relieve sab og stress.

BNH: Nganong dali ra man ka maka-compose og kanta?

Venice: Tungod kay inspired ko sa ako palibot ug ganahan ko maghimo og istorya bahin sa mga panghitabo through writing songs.

BNH: Unsa'y imong ika-advice sa aspiring composers karon?

Venice: Padayon lang gyud. Dili sila mawad-an og paglaom , keep writing songs and believe sa ilang talent.

BNH: Unsa ang dakong hagit nga imong nasugatan isip usa ka composer?

Venice: Katong panahon nga ma-reject ang akong entry sa mga songwriting contest. Usa kadto sa mga dakong hagit nga akong nasugatan.

BNH: Sa tanan nimong gi-compose nga mga kanta, unsay nagmarka gyud nimo?

Venice: Ang awit nga "Kinaiyahang Matahom." Mao kini ang akong entry sa Cebu Pop nga nahimo kong Finalist. Mao kini ang akong gikonsidera nga greatest achievement sa kalibutan sa musika.

BNH: Kinsa'y imong gihimong inspirasyon niining tanan nimong gibuhat isip composer?

Venice: Kining tanan akong gihimo alang sa akong pamilya aron makatabang sad ko nila financially.

BNH: Kun mahatagan ka’g kahigayonan sa pag-compose og kanta ug ipaawit sa mga nag-unang singers sa kauluhan, kinsay imong pilion ug unsa nga klaseng kanta ang imong ipaawit kaniya?

Venice: Si KZ Tandingan ug pakantahun siya nako og love songs.

BNH: May mga panahon ba kaniadto nga hapit na ka moundang sa pag -compose og mga kanta?

Venice: Oo miabot sa punto nga dili nako ganahan magsulat kay para nako wala kaayo nakatabang nako ang musika labi na sa financial aspect maong naay panahon nga mas gi-focus nako ang pagkanta rather than as a composer. Pero nabalik akong pagkamahiligon sa pag-compose sa dihang nahimo kong finalist sa Cebu Pop.

BNH: Unsa ang labing dakong pagtulun-an nga imong naangkon sa imong pagka-composer?

Venice: Learn to be patient. Dako nga pasensya ug pagsalig sa kaugalingon para ma-develop ang talento sa pag-compose ug dili mawad-an og paglaom bisan pa sa kadaghang tawo nga wa mosalig sa imong talento. (BANAT NEWS)