Eskina kusina: Bangers and Mashed Bombs

CEBU, Philippines - Kun duna’y m ga pundok-pundok uban sa mga  imong kabanay, dili usab malikayan nga  mag-andam og usa ka espesyal nga pagkaon aron mas magmaya ang panagtapok .

Ang www.yoursecretrecipes.com adunay gisugyot nga pagkaon nga maoy haom sa mga tawo nga ganahan og duna’y  masima-sima. Kini nga matang sa pagkaon  gitawag og “bangers and mashed  bombs “  nga matud pa sama lang kini sa bomba nga kun matilawan, makugang ka sa kalami.

Gani, magkinahanglan og mga ngilngig nga mga sagol nga sayon ra kaayo pangitaon sa  inyong suking tindahan.

Ang pagama sa maong pagkaon,  dili  maabtan og usa ka oras mao nga dali lang gyud kini ug dili na mabitin ang  imong kabanay nga gigutom.

Mga kinahanglanon:

600 gramos nga gipanitan ug gipabukalan nga patatas

1 sibuyas bombay (ginisa)

40 gramos nga cheddar cheese

nalanay nga butter

asin

paminta

8 ka naluto na nga Sausage

100  gramos nga harina

100 gramos nga breadcrumbs

2 binatil  nga itlog

mantika

gravy

Pamaagi sa pagluto :

Iduldog ang patatas, butter, sibuyas bombay, cheese, asin ug paminta. Mahimo kini nga usa ka dinuldog nga patatas.

Hiwaon ang mga sausage.

Ang nahimong naduldog nga patatas, i-rolyo ngadto sa sausage.

Mag-andam og tulo ka panaksan nga adunay sulod nga harina, itlog ug breadcrumbs,

Ang narolyo nga sausage, sapawan og harina, itlog, ug breadcrumbs.

Ilunod kini sa init nga kaha nga adunay mantika. Kinahanglan gyud bantayan ang pagluto niini aron dili mapa-ig.

Iha-on na kini ug ibutang sa plato nga adunay tissue aron mauga ang mantika.

Baliburan kini og gamay nga asin ug huwaton nga mo-uga.

Mahimo na kini nga i-serve ug kan-on.