CEBU, Philippines - Sa pagsaulog sa ika 60 ka tuig nga anibersaryo sa Archdiocesan Shrine of Our Lady of Lourdes diha sa Barangay Punta Princessa, usa sa mga kalihukan nga gi-highlight karong kapiyestahan mao ang hugyaw nga musical play nga nag-ulohan og “Song of Bernadette”. Mao kini ang ikaduhang higayon nga mapasundayag kini pagbalik human sa walo ka tuig.
Mahitabo kini karong Pebrero 17, 18 ug 19 sa Center Stage, SM Seaside, City Cebu sa alas dos sa hapon ug alas syete sa gabii. Mapalit ang ticket sa P300 ug P500. Adunay espesyal nga presyo sa ticket alang sa mga tinun-an nga mokantidad lang sa P150.
Moabot sa 70 ang nalakip sa cast niini ug ubos kini sa direksyon ni Mary Rose Villacastin-Maghuyop kinsa anak sa kanhi direktor sa maong pasundayag kaniadto nga si Madame Della Villacastin. Si Niño Matillano usab ang nahimong dance choreographer niini.
Gibutyag sa kura paruko sa maong parokya nga si Father Randy Figuracion nga usa ka milagro ang nahimong katumanan sa pagpasundayag og balik sa maong musical play gumikan kay ideya lamang nilang duha ni Niño James Bañares ang pagre-stage niini.
Matud pa niya nga dako gyud nga milagro ang ilang nadawat gumikan kay mobalor ngadto sa usa ka milyon ka pesos ang magasto alang sa production sa maong pasundayag. Dako usab ang iyang pasalamat ngadto sa mga tawo nga miabag ug misuporta gumikan kay dili kini mahitabo kung wala’y partisipasyon sa kadaghanan.
Ang Choir Master nga si Niño James ang nahimong scriptwriter sa maong play. Gitug-an niya nga wala siya’y lapad nga background kun unsaon ang hustong pamaagi sa pagsuwat og mga linya sa usa ka musical play. Suma pa niya nga agi og pagtabang, gibuhat niya ang iyang tanang mahimo aron makamugna og bag-ong script. Dugang pa niya nga nakatabang og dako kaniya ang usa ka nobela ug ang salida nga iyang gibasehan sa iyang pagsuwat.
Ang nabantog nga kompositor nga si Jude Gitamondoc mao usab ang nagmugna sa mga awit. Dugang pa nga aduna usa’y kola-borasyon sila si Bañares ug si Rev. Father Joriz Calsa alang sa awit nga nag-ulohan og “Let The Whole World Know”.
Magdagan ang istorya sa usa ka ordinaryong babaye nga ginganlan og Bernadette. Siya mao ang instrumento aron makahatag og milagro sa ilang baryo nga nagsagubang sa tumang kalisdanan ug nawad-an na sa paglaum nga mahatagan og pagtagad sa kagamhanan.
Gipadayag niya nga ang istorya ni Bernadette, usa gyud ka inspirasyon sa kadaghanan.
“Gipakatawo siyang kabus ug masakiton. Wala usab siya makatungha apan siya ang gipili nga mahimong makakita ni Mama Mary for 18 times. Wala gyud damha nga siya ang gipakitaan. Nahimo siyang mensahero sa paglaum ug mensahero sa Mahal na Birhen”, suma pa ni Father Randy.
Napanglantawan ni Father Randy nga magbaha ang mga tawo nga mohangop sa maong pasundayag sanglit karong panahona, nanginahanglan na gyud kita og milagro sa atong kinabuhi. Matud pa niya nga bisan og mga ordinaryong tawo, makahimo og dakong kausaban dinhi sa kalibutan kung aduna lang gyud kini hugot nga pagtuo ug dili mawad-an og paglaum. (BANAT NEWS)