Misidlak sa 2016

CEBU, Philippines – Aduna’y mga Sugbuanon ang nahatagan og maayong opurtunidad didto sa kaulohan human nabatyagan ang hugyaw nila nga mga talento.

Nasayran nga naandan na gyud nga duna gyu’y luna ang mga Sugbuanon sa national showbiz gumikan kay dili usab basta-basta ang abilidad niini.

Naa na sa huna-huna sa kadaghanan nga  kun maghisgot na gani og Cebuano talents,  dili gyud kini magpabangbang sa kahugyaw niini hinungdan nga dali ra kini mabatyagan sa katawhan.

Dave Bornea

Dakong garbo alang sa Sugbuanong aktor nga si Dave Bornea nga malakip sa serye ni Dingdong Dantes nga Alyas Robin Hood. Tungod sa maong serye, nahulma ang tandem nila ni Lindsay de Vera. Nalakip usab siya sa grupong One Up. Nasayran nga  napakyas si Dave sa damgo niya nga makasalmot sa StarStruck 6  sa dihang igo lang siya nakatungtong sa  Top 18. Nakasalmot na usab siya kaniadto sa Mr. Pogi segment sa Eat Bulaga.  Nagbunga matud pa ang taas niya nga pasensiya ug naabot gyud ang saktong break alang sa iyang career. Una na nga gibutyag ni Dave nga pangandoy na gyud niya kaniadto nga mahimong artista.

Abigail Abion

Nagsidlak-sidlak ang pangalan sa Cebuana dancer  nga si Abigail Abion didto sa kaulohan  human kini nahimong kampeyon sa segment  nga KemboTitas (Kembot sa mga Tita) sa noontime show sa ABS-CBN nga It’s Showtime.  Si Abigail maoy nangulo sa dance company nga  D’ Abyss Concepts and Events Services.  Usa usab  siya  ka  licensed Zumba instructor .

Galen Tan Chu

Dili lang sulod sa Pilipinas, misidlak usab ang Sugbuanon nga direktor nga si Galen Tan Chu kinsa usa sa mga responsable sa kalamposan sa animated film nga “Ice Age: Collision Course”.  Kasamtangang nagtrabaho si Chu sa  Blue Sky Studios didto sa Amerika.  Gisalida sa Pilipinas ang “Ice Age: Collision Course” niadtong July  karong tuiga.

Niel Murillo

Ang Sugbuanon    nga  si  Niel Murillo  maoy  labing una nga mananaog   sa  “Pinoy Boyband Superstar”     human  kini   nipabuhagay sa iyang hugyaw nga  performance sa maong show ug nakadawat og labing taas nga  puntos sa text votes ug scores sa mga hurado. Nagtangag nga premyo alang sa   17-anyos nga si Niel mao ang  P1-million cash prize ug malakip  usab kini sa pagahimoon nga boyband ubos sa Star Magic.

Miko Juarez

Naghudyaka ang mga Sugbuanon gumikan kay lain na sad nga Bisaya ang nailhan  didto sa kaulohan pinaagi sa reality talent show sa ABS-CBN nga Pinoy Boyband Superstar. Siya si Darren Dominic “Miko” Juarez   nga pag-umangkon sa Cebuana actress nga si Dionne Monsanto  ug apo sa  indie actress  ug product endorser nga si Dulcita  Siroy.

Kyle Dwight Sabinay

Laing Cebuano ang nisidlak  tungod sa Pinoy Band Superstar  mao si  Kyle Dwight Sabinay.  Unang ni-audition si Kyle sa maong show uban sa iyang igsuon nga si Keirt Aivan apan siya ra’y nataypan sa mga hurado.  Pagsulod pa lang daan ni Kyle sa maong show, kanunay na kini nga singgitan sa female teenagers.

Jindric Macapagal

Giila nga  “Bunso Gwapito ng Cebu”   ang laing Sugbuanon nga produkto sa Pinoy Band Superstar     nga si Jindric Macapagal.    Usa sa dili malimtan sa viewers mao ang pagkanta niya og “Night Changes” sa One Direction.  Nakauyon pag-ayo sa iyang performance  ang usa sa mga hurado nga si Vice Ganda  ug nilenggua kini og,” “Bongga ka, bongga ka. Wala na akong ibang sasabihin”.

Ralph Gica

Mikulit usab og atensyon sa national TV ang kaguwapo ni Ralph Gica  kinsa nailhan sa kadaghanan gumikan sa pagsalmot niini sa Pinoy Band Superstar.  Kanunay nga pakiligon ni Ralph ang girls sa higayon nga mo-perform siya. Ang tam-is niya nga pahiyom maoy usa sa naganahan kaniya sa mga tawo.

Marielle Montellano

Ni-  qualify sa  semi-finals sa “Tawag ng Tanghalan” sa  “It’s Showtime” ang Cebuana singer nga si Marielle Montellano.  Nahugyaw pag-ayo ang mga hurado sa iyang version sa “At Last” ni Etta James ug “Someone That I Used to Love” ni Barbra Streisand.

Dionne Monsanto

Gipamatud-an gyud sa Sugbuanon nga si Dionne Monsanto nga duna gyu’y positibong resulta ang maangkon sa tawo nga taas og pasensiya.   Human sa pipila ka tuig sa showbiz, nakaangkon  gyud og dakong break sa showbiz si Dionne pinaagi sa seryeng  “Tubig at Langis”  diin nidala siya isip kontrabida partikular na sa karakter ni Lucy Villadolid. Labihan ka sikat sa iyang karakter gumikan sa iyang gipakita nga abilidad sa pag-arte hinungdan nga daghan kaayong memes ang nitumaw online gamit ang screenshots sa iyang mga eksena.