CEBU, Philippines - Kun madunggan ang pagkaon nga French Toast, makaingon dayun ta nga mahalon kini nga klase sa pagkaon apan alang sa inyong kasayoran, nasayop kamo sa inyong pagtuo.
Kun buot hunahunaon, usa kini nga matang sa pagkaon nga dali lang himuon gumikan kay ang mga sagol niini, dali ra makita ug mapalit sa atong suking tindahan
Suma pa sa Filipinostylerecipe.com, ang French Toast dili lang usa ka panglangyaw nga pagkaon tungod kay aduna usab kini proseso nga alang kanato nga mga Pinoy. Gani, usa kini sa labing dali nga himuon alang sa pamahaw nga mahimong isagol sa gatas ug kape. Mamahimo usab kining himuon nga sima-simaon inigka kadlawon.
Mga sagol:
•1 ka putos sa slice bread
•4 ka Itlog
•1 ka baso sa gatas (Evaporada o condensada)
•1 o 2 ka kutsara sa asukar
•butter
PROSESO:
•Batilon ang upat ka itlog.
•Gamit ang dako nga panaksan, isagol ang binatil nga itlog, gatas, asin, ug asukar. Kinahanglan masagol kini og tarong.
•Itagsa-tagsa og humol ang tibuok parte sa slice bread sa pipila ka segundo.
•Painiton ang kaha ug butangan kini og butter. Kinahanglan dili kusog ang kayo aron dili mo-uga ang butter.
•I-toast ang hinumol nga slice bread hangtod nga mamahimong golden brown ang kolor niini.
• Balihon ang pikas bahin sa slice bread ug i-toast.
•Balikon ang proseso hangtod mahurot ang giandam nga slice bread.
•Kun maluto na ang tanan, mamahimo na kining i-serve (BANAT NEWS)