Blakdyak nakaplagang patay

CEBU, Philippines - Nakaplagan na nga  patay ang  46 anyos nga komedyanteng singer nga  si Blakdyak sa iyang panimalay  sa Dapitan Street, Sampaloc, Manila, niadtong Lunes sa gabii,  November 21.

Sa report sa GMA News, nakit-an ang patay nga lawas ni Blakdyak nga nakaputos og plastic ang ulo niini.

 Nagkatag usab ang mga gamit sa singer sulod sa kuwarto niini.

Ang anak  ni Blakdyak nga si Tommy maoy nakabantay  sa patay nga lawas sa iyang amahan.

Matud pa sa asawa ni  Blakdyak nga si Twinkle Formaran nga nitikang ang anak nila sa kuwarto sa singer-comedian aron unta pukawon gumikan sa  naka-schedule nga  gig niini niadtong gabhiona.

Dugang pa sa asawa ni Blakdyak nga  wala sila’y giawayan sa singer  ug giingong dugay na kini nga niundang sa bisyo niini sa pagamit og ginadiling drugas.

Sa pasiunang imbestigasyon , wala ‘y nakita ang kapulisan nga  foul play sa kamatayon ni Blakdyak. Tak-om hinuon ang pamilya sa singer sa tinud-anay nga rason sa kamatayon sa singer.

Lumad nga taga Zambales si Blakdyak o Joey Formaran sa tinuod nga kinabuhi .

Nisikat  si Blakdyak niadtong  dekada ’90 gumikan sa iyang mga kanta nga  “Modelong Charing,” “Goodboy,” ug “Asin At Paminta.”

Nalakip usab siya sa pelikulang  Alyas Boy Kano (1992), Squala (1998), Gangland (1998), Dahil May Isang Ikaw (1999), Asin at Paminta (1999), Weyt A Minut Kapeng Mainit (2001), ug S2pid Luv (2002).

Jodi ug Bridges napakyas sa Emmy

Napakyas si Jodi Sta. Maria sa  paglangkat sa  Best Actress award sa  2016 International Emmy Awards  nga gipahigayon  sa Hilton New York Hotel kagahapon.

Nasayran nga nominado si Jodi sa maong kategoriya  alang sa karakter niya isip Amor Powers sa Pangako Sa’ Yo  ug  ang  pambato sa Germany nga si Christiane Paul maoy nakaangkon sa maong award.

Nitambong mismo si Jodi sa maong kalihokan ug sa wala pa ang awarding ceremony , nilenggua na ang aktres og,” “This moment is a proof that dreams do come true.”

Samtang ang ABS-CBN drama series  kaniadto nga Bridges of Love  wala usab nakadaog sa   Best Telenovela category.

Ang maong serye gibidahan nila ni  Maja Salvador, Jericho Rosales, ug  Paulo Avelino nga  gipildi sa seryeng  Verdades Secretas sa Brazil.

Nadine andam buhian si James

Sa higayon nga mahuman na ang seryeng Till I Met You, andam si Nadine Lustre nga  makabaton og bag-ong leading man sa sunod niya nga proyekto.

Matud pa sa aktres nga usa kini sa pamaagi nga magkasaka ang istado sa tagsa-tagsa nila nga mga career.

Nag-agad ra hinuon si Nadine sa management apan iya na nga giandam ang iyang kaugalingon sa higayon nga bungkagon ang tandem nila ni James.

Target ni  Nadine ang  action  project  nga taod-taod na niya nga gipangandoy.

Matud pa sa aktres nga giidolo niya ang Hollywood star nga si Angelina Jolie ug dili gyud niya makalimtan ang mga pelikula niini nga sama sa Tomb Raider ug  Mr. and Mrs. Smith. 

The Unmarried Wife naka-P100M na!

Nagmaya og maayo ang  Star Cinema human mikita  og  kapin sa P100 million ang pelikulang “The Unmarried Wife” sulod sa unom ka adlaw nga pagpasalida niini.

Ang maong pelikula gibidahan nila ni  Angelica Panganiban, Dingdong Dantes ug  Paulo Avelino.

Ang maong figure gianunsyo sa Star Cinema  pinaagi sa ilang social media accounts kagahapon.

Kahinumdoman nga sa unang adlaw, mikita og  P17 million ang maong pelikula.

Matud pa nga padayon nga gilinyahan sa mga sinehan ang “The Unmarried Wife” busa gilauman nga motaas pa og maayo ang kita niini. (BANAT NEWS)