CEBU, Philippines - Pipila ka semana sa dili pa ang ilang kasal napanglantawan na karon ni Kaye Abad nga magbaha gyud ang mga bisita nila ni Paul Jake Castillo sa maong espesyal nga okasyon.
Gani gikan sa 600 , misaka na sa 900 ang ilang gipaabot nga mga bisita.Matud niya nga daghan kaayo sila og suod nga mga higala.
Matud pa niya nga ‘rustic’ ang tema sa ilang kasal ug pistachio green ang motif niini.
Dugang pa sa aktres nga gusto gyud unta niya nga color black ang iyang wedding gown apan naunhan na siya niini sa iyang ate sa dihang gikasal kini pito ka tuig na ang nakalabay hinungdan nga duna’y “touch” sa dark tones ang iyang napili nga color sa iyang wedding dress. Gipahibalo usab ni Kaye nga naapod -apod na usab ang mga invitation sa ilang mga guest.
Kaslon sila si Kaye ug Paul Jake dinhi sa Sugbo sunod buwan ug wala pa nila gipublikar ang final date niini.
Marian nataypan sa Portuguese designer
Mipaambit sa iyang dakong interest nga makapadangat og desinyo alang kang Marian Rivera ang nabantog nga Portuguese designer nga si Joao Rolo. Gani sa Instagram post ni Joao , gi-post niini ang sanina nga iyang gidesinyo alang sa Kapuso actress nga gitawag pa niya’g prinsesa.
Usa ka lavender ug light blue floral appliqués black dress ang iyang gihimo alang sa aktres.
Samtang gipabuhagay usab ni Marian ang iyang dakong pasalamat sa maong designer pinaagi sa pag-reply niya sa post sa maong sikat nga designer.
Si Joao mikulit na og pangalan dili lang sa Portugal kundi lukop kalibutan sa natad sa pagmugna og dekalidad nga mga gown ug sapot sa mga nabantug nga mga personalidad sa nagkadaiyang nasud. (BANAT NEWS)