Emman Vera in Cebu!

CEBU, Philippines - Isip tipik sa ika 23 ka tuig nga anibersaryo sa Gaisano Country Mall padayon gihapon ang usa ka bulan nga selebrasyon pinaagi sa mga diskwento ug kalingawan.

Gani, sugod ug mapuhon, October 14 hangtud sa Domingo, October 15, ipahigayon ang Anniversary Sale niining musunod nga mga tindahan: Gaisano Main, Gaisano Country Mall, ug Gaisano Bogo.

Dagkong diskwento ang mapahimuslan sa mga mamalitay dinhi niining mga tindahan atol sa nahisgutang mga adlaw.

Sa Sabado, October 15, muabot sa Sugbo ang membro sa O Diva nga finalist sa We Love OPM sa ABS-CBN nga si Emman Vera.

Si Emman mulingaw sa mga customers sa Gaisano Balamban - 3:00PM atol sa Sakyan ang Pang-Negosyo Final Draw.

Gikandidto, mulugwa sab siya sa Gaisano Country Mall Parking - 8:00PM aron paglingaw sa mga mamalitay pinaagi sa mga awit ug paghimamat usab sa iyang mga fans.

Ariel mibalik sa GMA

Human nilugwa sa pipila ka mga programa sa ABS-CBN, mobalik na usab si Ariel Rivera sa GMA-7 pinaagi sa afternoon series nga Hahamakin Ang Lahat kung diin makauban niya si Eula Valdez. Mipirma lang si Ariel og per project contract busa mahimo siya nga makatrabaho puhon og laing network.

Komportable sa ex-GF

Kumportable ra si Kristoffer Martin nga makatrabaho ang kanhi niya uyab nga si  Joyce Ching sa bag-ong serye sa GMA-7 nga  “Hahamakin Ang Lahat.”  Matud pa sa aktor nga gipabilin nila ang ilang panaghigalaay sukad sila nagbuwag.

Julie Anne matinahuron

Bilib kaayo si Christian Bautista kang Julie Anne San Jose gumikan sa pagkamatinahuron niini. Matud pa nga “kuya” ang itawag ni Julie Anne kaniya. 

Jaclyn napungot

Nagplano si Jaclyn Jose nga modangop sa otoridad gumikan sa mga tawong nagpunay og daot  sa iyang anak nga si Andi Eigenmann.  Matud pa niya nga bahala’g siya ang kontrahon, basta dili lang hilabtan ang iyang anak .

Edu nanglibre og lafang 

Nanglibre og panihapon si Edu Manzano sa iyang mga kaubanan sa seryeng  Someone To Watch Over Me . Matud pa niya nga na-enjoy siya og maayo sa maong serye.

Naglikay sa cellphone

Giingong temporaryong nipahuway si Alma Moreno sa pagamit sa iyang cellphone aron dili siya mosamot og ka-stress. Nangayo siya og pasaylo sa tanang nikontak niya gumikan kay maglisod pa siya og tubag niini ilabi na karon nga nagmagul-anon siya human napriso ang iyang anak nga si Mark Anthony Fernandez.

Misakay  sa uso

Nagkadaghan na ang mga artista nga nisayaw sa sikat na kaayo nga Pen-Pineapple-Apple-Pen. Human sa version nila ni Jose Manalo, Wally Bayola, ug  Paolo Ballesteros,  niapil pud sa uso sa maong dance craze sila si Alden Richards, Maine Mendoza, Vice Ganda, Ryza Mae Dizon, Kim Chiu, Vhong Navarro, Xian Lim, Liza Soberano ug Enrique Gil.

Gibalhin og laing prisohan

Natuman na gyud ang hangyo ni Mark Anthony Fernandez nga mabalhin og laing prisohan.  Nasayran nga nagtingkagol na karon si Mark sa Pampanga Provincial Jail. Giingong wala kaantos si Mark sa  Angeles City Jail   gumikan sa kahuot. Matud pa nga 20 lang ka tawo ang kapasidad sa maong prisohan, apan niabot na og 120 ka piniriso ang kasamtangang sulod niini.

Sekreto para bibo

Giangkon ni Maja Salvador nga duna’y lalaki nga midiskarte niya karong panahona  apan nagdumili siya pagbutyag sa pangalan niini. Gitataw hinuon sa aktres nga nag-ilhanay pa sila sa usa’g-usa.  (BANAT NEWS)