CEBU, Philippines - Sa natad sa showbiz, duha ra ka butang ang gikinahanglan aron molampos , kakugi ug swerte. Kining duha pulos anaa kang Laurence Mossman. Positibo ang unang paglugwa sa batan-ong mestiso sa telebisyon pinaagi sa seryeng “Dolce Amore” gumikan kay padayon kining nag-abli kaniya og daghang oportunidad.
Gawas sa pag-renew niya sa kontrata ubos sa Creworks Asia isip brand ambassador sa sabon sa Psalmstre, ang New Placenta for Men, padayon gihapon siya nga makit-an sa Resorts World Manila katulo sa usa ka semana kuyog ang iyang mga ka-grupo sa Primo, ang trio nga gilangkuban sa mga sama niya nga half-Filipino. Regular silang modalit sa mga huni ug awit nga kasagaran mga OPM.
Ang labing nakapalipay karon sa international model mao ang dagkong proyekto diin siya nalakip. Bag-o lang nahuman ang iyang shooting sa pelikulang “Die Beautiful” kauban ang komedyanteng si Paolo Ballesteros.Usa ka doktor ang iyang papel sa maong lilas.
Sulod niining semanaha, sugdan na usab niya ang laing shooting alang sa pelikulang “Bakit Ang Mga Gwapo Ay May BF” nga gibidahan nila ni Dennis Trillo ug Anne Curtis. Sunod bulan, ang half-New Zealander ug half-Filipino mohimo sa iyang birthday mall show kauban ang co-endorser niya sa Psalmstre nga si Miss Earth-Air 2012 Stephany Stefanowitz.Gidapit usab siya nga mohatag og dugang bulok atol sa anniversary celebration sa usa sa mga dagkong mall sa Koronadal, South Cotabato sa kataposang semana sa Agosto.
Sugod karong Nobyembre, makatrabaho ni Laurence ang Broadway star nga si Lea Salonga alang sa usa ka musical play.
“Dako nakong kalipay nga makatrabaho ang duha ka malampusong artista. Working with Anne and Miss Lea, I think, is one of the biggest dreams of most actors and singers. Swerte kaayo ko nga nahatagan ning maong kahigayonan. Excited kaayo ko alang ning maong mga proyekto. Sigurado ko nga daghan kaayo kog makat-onan kanila,” mapahiyomong pagpaambit ni Laurence.
PBB gipatawag sa MTRCB
Aduna’y mahitabo nga dayalogo tali sa mga kadagkoan sa Movie and Television Review and Classification Board (MTRCB) ug sa mga producer ug writers sa kasamtangang season sa Pinoy Big Brother (PBB) ugma sa buntag.
Aduna kini kalabotan sa usa ka episode sa maong show kung diin gibugalbugalan si Rita Gaviola o Badjao Girl sa kaubanan niya nga housemates.
Kahinumdoman nga duna’y episode nga puwerting hilaka ni Badjao Girl gumikan kay gibugal-bugalan siya sa pipila niya ka housemates kung diin gikataw-an pag-ayo ang iyang “underwear”.
“With the above, and considering further the age as well as gender of the concerned housemate, not to mention the representation made in your program that she belongs to an indigenous group or peoples of the Philippines, we are impelled to ask your aftendance, through your authorized representative/s at a conference scheduled for 18 August 2016, 10:30 a.m. at the MTRCB Adjudication Room, “ unod sa suwat nga gipadala sa MTRCB ngadto sa PBB.
Kahinumdoman nga usa sa wala mahimuot sa maong episode mao si Albay 2nd District Representative Joey Salceda ug nanawagan kini sa nagkadaiyang ahensya sa gobyerno nga mohimo og aksyon kalabot niini.
Gawas sa MTRCB, nanawagan usab siya sa Department of Social Welfare and Development (DSWD), ug National Commission on Indigenous Peoples (NCIP).
“PBB must be unequivocal against incipient discrimination, subconscious racism and the bullying it engenders in any contour and complexion, only made grievous by its grand display to a national audience esp to its target segment—the youth whose moral judgment is just forming,” tipik sa Facebook post ni Salceda.
Andi ug Jake nagtinubagay
Nag-engkuwentro pinaagi sa mga mensahe nila sa Twitter ang kanhi mag-uyab nga sila si Andi Eigenmann ug Jake Ejercito.
Giingong nagsugod kini sa dihang wala matud pa nahimuot si Jake nga nahisgotan ang iyang pangalan atol sa presscon sa bag-ong pelikula niini nga Camp Sawi.
“Alright, I’ve no idea why I’m being mentioned in interviews to promote something I’m not even part of and when my closest connection to the film is someone I haven’t been in proper contact with for a long time.Can’t you promote your film by only entertaining questions about the film or perhaps your career?,” suma pa ni Jake.
Nigamit usab si Jake sa hashtag nga ‘#CampMoveOn.’
Wala kini lung-i ni Andi,ug nipabuhagay usab siya sa iyang mensahe sa Twitter ug giklaro niya nga igo lang siya nitubag sa mga pangutana sa reporters.
“Mayroon akong apat na maganda, sexy, at magagaling na kasama sa pelikula hindi kita kailangan para lang panoorin ang pelikula namin.”
Gitawag usab niya og hambugero ug ‘narcissistic’ si Jake.
“Kaya nawala yung taong mahal mo sa buhay mo dahil masyado kang busy hanapin lahat ng mali kesa tumingin sa tama,” dugang pa sa aktres. (BANAT NEWS)