CEBU, Philippines - Giklaro sa bag-ong internet sensation nga sila si CJ Navato ug Kristel Fulgar nga managhigala ra sila ug wala’y relasyon nga nahulma tali nilang duha. Nabantayan sa netizens ang chemistry sa duha hinungdan nga niulbo ang isyu nga aduna sila’y gitago nga relasyon apan matud pa ni CJ nga wala siya manguyab kang Kristel. “Ever since kasi, like what I discovered, isa ako sa mga konting lalaki na kinakausap niya sa showbiz. Kasi she’s very reluctant. Repulsive siya sa mga hindi niya kayang pagkatiwalaan.And since kababata niya ako, she feels like she can trust me even if may mga downsides na medyo gamol nga akong tao,” matud pa ni CJ.
Nagplanong maghikog
Gibutyag ni Ryzza Cenon nga dunay mga higayon kaniadto nga nakahunahuna siya nga maghikog gumikan sa depresyon ug maayo na lang gani nga nakontrol niya ang iyang kaugalingon. Duna’y mga higayon nga nimingaw ang career ni Ryzza nga maoy hinungdan sa depresyon nga iyang nasinati.
Nakulbaan sa kissing scene
Gitug-an ni Thea Tolentino nga nakulbaan siya dihang nasayran niya nga duna sila’y kissing scene ni Aljur Abrenica sa seryeng Once Again. Saysay pa ni Thea nga hapit siya makuyapan tungod sa kalit-kalit nga on-screen kiss nila ni Aljur.
Nagpanikad
Excited ang magtiayong Doug ug Cheska Kramer alang sa Superstar Princess theme nga birthday celebration sa ilang anak nga si Kendra.Matud pa sa Instagram post ni Cheska, ni-request gyud si Kendra nga mosayaw ug mokanta ang iyang amahan sa maong selebrasyon.
Sarah ganahan mobalik
Nagmalaumon si Sarah Geronimo nga makabalik na siya sa The Voice isip coach sunod tuig kung dili na siya busy. Malipayon si Sarah sa positibong feedback nga nadawat ni Sharon Cuneta nga maoy nihulip kaniya isip coach sa kasamtangang season sa The Voice Kids. Una na nga gipadayag sa singer nga nipahuway siya sa The Voice aron maka-focus sa uban niya nga mga proyekto sa ABS-CBN.
Dili pa andam
Giangkon ni Miles Ocampo nga duna’y nanguyab niya karon apan maglisod siya og abi-abi niini gumikan sa ka-busy sa iyang schedule. Suma pa sa aktres nga dili lalim ang pag balanse sa iyang oras gumikan kay gawas sa showbiz, nagtungha pud siya sa University of the Philippines sa kursong Theatre Arts.
Pia mirepresentar sa Pilipinas
Si Miss Universe 2015 Pia-Alonzo Wurtzbach ang representante sa Pilipinas sa panagtigom sa United Nations kalabot sa kampanya sa pagsumpo sa sakit nga AIDS/HIV sa tibook kalibutan. Ang general assembly nahitabo sa miaging adlaw sa UN headquarters sa New York. Ang maong assembly gitambongan sa nagkadaiyang heads of State ug Government, ministers, representante gikan sa civil society ug international organizations, private sector, scientists, ug researchers.
Jai motikang sa nasud
Mobisita ang X-Factor Australia Season 5 grand finalist nga si Jai Wetford sa Manila karong weekend. Ang social media sensation aduna’y mga mall show sa Eastwood Mall Open Park , Venice Grand Canal ug McKinley Hill ,Uptown Mall ug Fort Bonifacio. Magsilbing front act sa singer ang Pinay internet sensation nga si Kristel Fulgar.
Espesyal nga bisita
Human sa 15th birthday ni Darren Espanto busy ang singer sa pag-promote sa iyang album ug sa iyang upcoming concert nga D Total Experience.Usa sa gustong makita ni Darren sa iyang umaabot nga concert mao ang iyang crush nga si Cassy Legaspi. Matud pa sa singer nga nahatagan na kini niya og imbitasyon.