CEBU, Philippines - Gidumog sa liboan ka mga Sugbuanon ang mall show sa cast sa pelikulang Love Me Tomorrow nga sila si Coleen Garcia, Piolo Pascual ug Dawn Zulueta niadtong Lunes sa hapon sa SM City Cebu.
Niabiba ang mga tawo human nikanta si Coleen Garcia og Price Tag, samtang gipakilig nila ni Dawn ug Piolo sa ilang pag- duet sa kanta nga Like I’m Gonna Lose You ang mga nanan-aw.
Sa pagkanta ni Piolo, misaka kini sa escalator aron makaduol siya sa iyang mga supporters nga naa sa ikaduhang andana sa mall. Bisan usab sa laing andana sa maong mall puwerting punoa gyud sa mga tawo uban sa sipa kaayo nga pakpak.
Gawas sa mga taga Cebu, lakip sa nitan-aw sa mall show ang mga fans nila nga nagikan pa sa Iloilo ug Dumaguete .
Kasagaran niini nituyo lang gyud og tikang dinhi sa Sugbo aron lang gyud makakita sa ilang mga idolo.
Sa pagsulod pa lang nila sa venue sa mall show, todo siyagit na ang mga tawo.
Nagpasalamat ang mga cast sa pagdawat sa mga Sugbuanon kanila ug dako ang ilang pagsalig nga suportahan ang pelikula nga Love Me Tomorrow nga showing na sugod karong adlawa sa mga sinehan lukop nasud. —Shannin Lehvee Marzon ug Leslie Marie Tumulak (BANAT NEWS)