CEBU, Philippines - Ka hugyaw! Lami ang avocado, labi na og bugnaw unya butangan og gatas. Lami sab kun butangan og mangga ug saging. Apan ang mas hugyaw mao nga, ang liso sa avocado nga kasagaran atong ilabay, kay nagtuo ta nga dili na magamit, gawas lang sa pamasin nga muturok kini, mas daghan pa diay og sustansya, itandi sa unod niini mismo. Ug mas lami pa gyud diay! Ngano man?
Suma pa sa www.stethnews.com, ang liso sa abogado, tugob sa antioxidants nga makatabang aron moubos ang imong cholesterol level, mabatukan ang mga pagpanghupong ug pagpanghubag sa imong kaunoran, mudepensa batok sa risgo sa diabetes ug mupaubos sa imong blood pressure. Puno kini sa antioxidants nga makapalig-on sa imong immune system.
Dugang pa nga ang liso sa avocado makatabang batok sa sakit sa kasingkasing, arthritis, cancer, gastric ulcers ug dysentery. Nasayran nga tugob og soluble fiber ang maong liso. Gani, mas daghan pa kini og fiber itandi sa mga utanon. Gumikan niini, dako gayud kini og matabang ngadto sa adunay sakit sa kasingkasing. Apan unsaon man?
Galingon ang liso sa avocado. Kinahanglan nga mahimo na siyang powder ug maoy isagol alang sa lamian nga smoothie o shake. Ang recipe mao ni:
Ingredients
½ avocado seed
Upat ka mansanas
Usa ka saging (hinog, lakatan)
Duha lemon, pinanitan
Usa ka tasa sa spinach
Usa ka pungpong sa parsley
¼ luy-a
Usa ka stalk sa celery
Pamaagi
1. Ibutang sa food processor ang avocado. Kinahanglan nga mahimo na kining powder. Galinga, dukduko, basta mahimo na siyang powder.
2. Tungaa kini. Ang katunga ra nga avocado powder maoy imong kinahanglanon.
3. Isulod sa blender ang tanang ingredients aron matunaw.
4. Sag-aha kini, usa pa imna.
Good for one serving ra na dear okRYANians. Sweet and sour matud pa ang lami niana. Pwes, atong suwayan. Dili usikan ang liso sa avocado. Hinunua, atong pahimuslan aron ang atong lawas, sa sakit mapanalipdan. Pakpak!