Bea ug Lloydie nag-date sa Balesin?

CEBU, Philippines - Usa ka netizen ang nagpaila ang nagtangan sa username nga “arnoldsantiago” ang  nibutyag nga  nitikang sila si Bea Alonzo ug John Lloyd Cruz sa Balesin Island niadtong Martes sa alas 10 sa buntag.

Gisakyan matud pa sa maong mga artista ang two-seater private plane ug matud pa sa maong netizen, higala  niya ang mga pilot sa maong eroplano.

Una na nga migawas ang taho sa miaging adlaw nga matud pa, nag-uban sad ang duha didto sa usa ka exclusive restaurant sa Tagaytay City.

Kahinumduman nga mikisaw ang tsismis nga duna’y relasyon ang duha  human nigawas ang report nga nagbuwag sila si John Lloyd ug Angelica Panganiban nga gisundan sa kumpirmasyon ni Zanjoe Marudo nga  buwag na sila si Bea.

Nangandam sa kaugmaon

Giangkon ni Daniel Matsunaga nga todo tigom na siya karon isip preparasyon sa kaugmaon nila ni Erich Gonzales. Suma pa ni Daniel nga kung magpakasal na man gani sila si Erich, ilahang seguraduon nga andam na gyud sila niini. 

Blanko gihapon

Tsika pa ni  Coco Martin nga wala pa gyu’y babaye nga nakapapitik karon sa iyang kasing-kasing busa gidawat na niya ang kamatuoran nga madugay pa ang pagsulod niya sa kalibutan sa kaminyoon.   Gihatagan hinuon niya karon og dakong atensyon ang iyang showbiz career ilabi na karon nga naglawig sa kahanginan ang serye niya nga Ang Probinsyano.

Makauban ang anak 

Malipayon si AiAi delas Alas gumikan kay makauban niya sa iyang upcoming  indie movie ang  anak niya nga si  Sancho . Suma pa sa aktres nga iyaha gyud nga nagiyahan sa pag-arte ang iyang anak.

Diego gikilig og samot

Wala pa’y idea si Diego Loyzaga kung teleserye o pelikula ba ang sunod  niya nga proyekto kung diin makauban niya si Sofia Andres. Nasayran nga midiskarte si Diego kang Sofia  ug padayon siya nga nagpaabot og positibong tubag gikan sa aktres. Gikilig og samot si Diego sa dihang nasayran niya nga makauban niya si Sofia sa usa ka major project.

Nagbaha ang nagpa-audition

Ubay-ubay ang nagpa-audition aron malakip sa remake sa Encantadia apan nagdumili pagtug-an ang GMA-7 kung kinsa kini nga mga artista ang nangandoy  nga malakip sa maong proyekto.  Posibleng sa June o July magsugod ang maong pantaserye. 

Tinuod  nga pangalan

Tsika pa ni  Gloc-9 nga   Aristotle Pollisco ang tinuod niya nga pangalan. Nalingaw ra siya sa iyang screen name nga Gloc 9 ilabi na nga dali ra kini  matiman-an. Misidlak og balik ang singing career ni Gloc 9 ug samotan na nga nipirma siya og kontrata sa Star Music. 

Reaksyon ni papa

Gibutyag ni Edu Manzano nga nasayod na sila si  Luis Manzano ug Angel Locsin sa angayan nila buhaton busa masaligon siya nga mag-uli ra ang duha. Wala’y idea si Edu sa tinud-anay nga rason kalabot sa pagtakilid sa relasyon nila ni Luis ug Angel.

Kever sa intriga

Dako ang pasalamat ni Valeen Montenegro gumikan kay wala gyud nabakante ang iyang career. Malakip ang aktres sa umaabot nga serye ni Regine Velasquez  sa GMA-7 nga Poor Señorita. Nagpabiling tak-om si Valeen sa tsismis nga matud pa siya’y rason sa breakup nila ni Ciara Sotto ug  Jojo Oconer.

One Heart

Mag-uban ang promising singers sa Kapuso Network alang sa charity album nga  One Heart kung diin ang kita niini itabang sa mga programa sa GMA Kapuso Foundation. Ang mga artista nga nisuporta niini mao sila si Glaiza de Castro, Yasmien Kurdi, Derrick Monasterio, Kristoffer Martin, Kylie Padilla, Ruru Madrid, Julian Trono, Betong Sumaya, Gabbi Garcia, Maricris Garcia, Rita Daniela, Nar Cabico, Ralf King, Lindsay De Vera,ug  Denise Barbacena. 

Meg todo diet

Giangkon ni Meg Imperial nga niaksyon siya og kabalaka sa dihang kalit siya nga nanambok sa miaging tuig. Mao kini ang rason nga nagkontrol na  si Meg sa iyang kinaon aron dili mawala ang iyang sexy body.

Heneral Luna nominado sa Asian Film Awards

Nominado alang sa best actor category sa 10th edition sa  Asian Film Awards ang bida sa pelikulang Heneral Luna nga si John Arcilla .

Siya lang ang nag-inusarang Pinoy nga nominado alang sa maong film festival busa nagpanikad na siya niini.

Nominado usab ang Heneral Luna  alang sa kategoriya nga  Best Production Design ug  Best Costume Design.

Ang mga nominado sa Asian Film Awards gianunsyo niadtong Miyerkules didto sa Hongkong.

Ang  awarding ceremony mahitabo karong  March 17 sa Venetian Theater sa Macau.

Makatigi ni John sa best actor category  sila si  Donnie Yen  (Ip Man 3 sa Hongkong) Japan’s Nagase Masatoshi  (An sa Japan)  ,  Feng Xiaogang ( Mr. Six sa China) Lee Byung-Hun (Inside Men sa South Korea).

Kahinumduman nga gipistahan og maayo sa moviegoers ang Heneral Luna  kung diin nikita kini og  P257 million sa  box office. 

Mao usab kini ang pambato sa Pilipins  alang sa  Best Foreign Language Film sa  88th Academy Awards.

Dili  pa lang dugay, gi-release na ang  Heneral Luna DVD nga nakahalin na sa pagkakaron  og kapin sa  7,000 ka mga kopya. 

Sexbomb Girls nag-reunion

Subling nag-uban ang pipila ka  orihinal nga sakop  sa dance group nga Sexbomb Girls niadtong Martes  alang sa usa ka  simpleng panihapon.

Nasayran nga taud-taud na sila nga wala nagkita  gumikan kay duna na sila’y tagsa-tagsa ka mga prayoridad.

Sa Instagram post, nag-uban sa simple  dinner sila si Rochelle Pangilinan, Jopay Paguia-Zamora, Mia Pangyarihan, ug  Sunshine Garcia.

Kahinumduman nga gawas sa  pag- perform sa longest-running noontime show nga “Eat Bulaga!” , nahimo usab nga bida ang  Sexbomb Girls sa top-rating afternoon drama series sa GMA  kaniadto nga “Daisy Siete” nga nilungtad sa ere og unom ka tuig.

Pipila sa sikat nga awit sa  Sexbomb Girls naglangkob sa  “Spaghetti Song,” “Bakit Papa,” ug  “Bilog na Hugis Itlog.”

Sitti dunay bag-ong album

Human sa pipila ka tuig nga pagpahuway sa pagama og album,  nibalik na karong tuiga  si Sitti Navarro alang sa iyang latest album.

Kasamtangan niya nga gi-promote karon ang iyang album nga “Singles Bossa Nova Trio”  kung diin aduna kini original songs.

Usa pud sa mga unod niini mao ang sinuwat  niya nga kanta nga alang sa iyang bana nga nag-ulohan og Ligaya.

Ang katapusang album ni Sitti  mao ang “Cafe Bossa” kung diin nahimo kini nga double platinum album.

Si Sitti maoy special guest kagahapon sa  Mornings @ ANC kung diin gikanta niya ang “Answers”.