Tribu Himug-ulaw Festival Queen

Giisip niya nga usa ka gasa gikan sa Balaang Bata nga si Senyor Santo Niño ang wa damhang pagdaug niya sa usa ka grandyosong indigay sa mga maanyag nga lead dancers sa mga nagkalain-laing contingents nga mosalmot sa Sinulog Grand Parade.

Sa 11 ka mga kandidata, si Cynthia Thomalla nga pambato sa Tribu Himug-ulaw sa Placer, Masbate ang nakoronahan isip Sinulog Festival Queen 2016 sa miaging Biyernes sa gabii.

“I feel very happy and very blessed. I am so thankful… I did not expect this (award) but I was praying every night to the Holy Child hoping to win,” matod sa 20 anyos nga Tourism and Events Management graduate sa STI College - Maasin City, Leyte.

Mao kini ang ikaduhang tuig sa maong grupo nga nasakmit ang susamang ganti ang ilang pambato man usab sa nilabay nga tuig nga si Julienne Hazel Penserga ang nakoronahan.

Atol sa ika-13 nga tuig sa Search for Sinulog Festival Queen niadtong January 15, si Penserga mismo ang mitunol sa maong korona sa dihang gideklarar nga mananaug si Thomalla nga mirampa sa gown nga gi-design ni Kenneth Yamas.

Gawas sa iyang kadaugan, gihakot sa maong Filipina-German beauty ang mga special awards sama sa SM Sinulog Festival Queen; Miss Kokuryo Cosmetics; Miss OLX Philippines; Yamaha Rev Queen; Miss Petron Value Card; Miss SUN; Miss Lecit-E; Miss BHI; Miss Photogenic; ug sa Best in Production Presentation.

Posibleng dili lisod alang kang Thomalla ang sunod-sunod nga kadaugan gumikan kay mahiligon siya sa pagsayaw ug modeling. Usa usab siya ka sports enthusiast labi na kun may kalabotan kini sa archery ug distance running.

Midaog siya sa unang higayon sa Miss Macrohon niadtong 2011 sa iyang lugar nga natawhan sa Macrohon, Southern Leyte province.

Siya usab ang gideklarar nga 2nd runner-up sa Miss Southern Leyte ug 1st runner-up sa Miss Merida niadtong 2012.

Siya usab ang mihulip isip Miss Pintados niadtong 2013. Siya karon ang reigning Miss Mandaue 1st runner-up.

Karon si Thomalla nangandoy nga mosalmot sa prestihiyosong Bb. Pilipinas pageant.

Ang mikumpleto sa linya sa mananaug sa Sinulog Festival Queen mao si Marianne Hernandez (1st runner-up) sa Carcar City, Cebu; Ceydney Basalo (2nd runner-up) sa Don Sergio Osmeña Sr. Memorial National High School-Barangay Labangon, Cebu City; Hyra Desiree Betito (3rd runner-up) sa Looc Norte National School of Asturias; ug si Reignna Azucena Tan Mondoy (4thrunner-up) sa Tribu Katbalaugan-Catbalogan City, Samar.

Nakuha usab ni Hernandez ang top spot sa Best in Runway competition nga gipahigayon sa miaging Huwebes sa SM City Cebu-North Wing. Ang midaog isip 1st runner-up mao si Basalo samtang si Betito usab ang 2nd runner-up.

Si Hernandez usab ang midaog sa Best in Festival Costume sa pagdala sa gown nga gidesinyo ni Aldo Sineneng ug ang Best Festival Costume nakuha ni Shayne Maxilom sa Tuburan, Cebu province sa gown nga gidesinyo ni Roy Erwin Tizon.

Si Basalo ang midaug sa Best Solo Performance samtang si Mondoy mao sa Best in Group Performance, diin ang grupo niini sa Tribu Katbalaugan ang midaug sa Best in Instrumentation.