CEBU, Philippines – Nagkatapok na sab sa St. Francis Ocean Park niadtong Disyembre 23, 2015 sa gabii ang mga Nagahanon uban sa ilang mga bisita alang sa ika-walo ka tuig nga pagpahigayon sa Festival of Lights kon Dagitab.
Kini mao ang unang higayon nga nikabat ngadto sa 10 ka contingents ang nisalmot alang sa sayaw sa kadalanan ingon man sa panagtiging ritwal nga gikan sa mga tunghaan sa dakbayan sa Naga nga gipaluyuhan sab sa ilang mga ka-barangay.
Kahinumduman nga nahimugso ang Dagitab Festival niadtong tuig 2007 dihang nahimong siyudad ang Naga. Gani mapasigarbuhon ang pamunuan ni City of Naga Mayor Val Chiong nga ang ilang lugar maoy pinuy-anan karon sa duha ka coal-fired power plants sa Sugbo diin nakatabang sa pagsuplay og kuryente tibuok Metro Cebu ingon man sa kasilinganang lalawigan sa Visayas region.
Sa 10 ka contingents, lima ang gideklarang mananaug diin nakuha ang unang ganti sa Tribu Masidlakong Dagitabnon sa Naga National High School. Mas misidlak gyud ang ilang performance atol sa ritual showdown diin tipik niini mao nga ang pasko alang sa mga bata. Gani lakip nga mipasundayag ang mga nag-costume og cartoon characters ug mga superheroes, nagpahugyaw sa mga nanan-aw.
Sud sa lima ka minutos, napaabot sa matag contingent kun unsa ang tema sa ilang mga performance.
Sadya kaayo ang ilang mga choreography nga gidunganan sa ilang mabulokong costumes ug props nga mosiga ug magkidlap-kidlap.
Nakadawat og trophy ug cash prizes ang mga midaug:
Ritual Showdown:
1st - Naga Nat’l High School – TribuMasidlakong Dagitabnon (P60K)
2nd - Uling Nat’l High School – Pundok Nagkahiusang Pamilya (P45K)
3rd - Balirong Nat’l High School – Lumad Balironganon(P35K)
4th - LangtadPLSMNHS — Tribu Placiidohanon (P30K)
5th - Siena School of Naga, East Poblacion - The Dancing Inmates Tribe(P25K)
Best In Street Dancing:
Balirong Nat’l High School – Lumad Balironganon
Best In Costume:
Naga National High School – Tribu Masidlakong Dagitabnon
Subling gipamatud-an sa maong festival nga kini maoy usa sa mga giatngan nga kalihukan matag panahon sa pasko dinhi sa Sugbo.