CEBU, Philippines – Mitaliawan na ang giila nga Master Showman sa showbiz industry nga si German “Kuya Germs” Moreno kagahapon sa alas 3:20 sa kadlawon gumikan sa cardiac arrest.
“He passed on in the company of his family and friends.He lived a full life, touched so many hearts through the years, and helped make dreams come true for most of the biggest stars in the Philippine entertainment industry.We are deeply saddened by his passing but we are comforted by the thought that his legacy will live on,” statement nga gipagawas sa pag-umangkon ni German nga si John Nite.
Kahinumduman nga sa miaging tuig, na-mild stroke ang 82 anyos nga beteranong TV host-actor.
Pipila ka semana human siya na- stroke, nibalik kini sa iyang radio program sa dzBB ug sa iyang late-night weekly show sa nga Walang Tulugan With The Master Showman.
Nabatyagan sa kadaghanan nga dili na kaayo abtik ang lawas ni Kuya Germs, gani kanunay siya agakon kung duna siya tambongan nga kalihukan.
Usa sa iyang mga event nga gihuptan mao ang Walk of Fame sa Eastwood City niadtong December 1, 2015.
Nakatambong pa si Kuya Germs sa New Year countdown sa GMA Network sa SM MOA Arena ug mao kini katapusan niya nga public appearance.
Suma pa sa report nga nadawat sa PEP, alas 7:30 sa buntag niadtong Huwebes, January 7, gidala si Kuya Germs sa St. Luke’s Medical Center, sa Quezon City.
Si Kuya Germs maoy usa sa gikonsiderar nga haligi sa local show business gumikan sa kadaghang artista nga iyang natabangan.