CEBU, Philippines – Todo promote karon si Lyca Gairanod sa iyang latest single nga Sa Isang Awit. Target usab sa batang singer nga makasulod sa acting world. “Gusto ko pong umarte kung bibigyan ako ng chance,” matud pa niya.
Nagpahumot sa masa
Permanente na nga co-hosts sa It’s Showtime sila si Mariel Padilla ug Amy Perez. Gidungog nga gipuno sila si Mariel ug Amy sa maong programa gumikan kay kusog ang ilang karisma sa masa.
Klaro sa pattern
Bisan wala’y direktang pag-angkon, giingong tataw na ang relasyon nila ni Max Collins ug Pancho Magno kung basehan ang ilang mga lihok. Una na nga gipadayag ni Max nga bilib gyud siya kang Pancho gumikan kay pinangga siya niini.
Andam na ang balay
Padayong nagpakahilom sila si Vic Sotto ug Pauleen Luna sa detalye sa ilang kasal aron malikayan ang paghugop sa mga tawo. Andam na ang balay nga ilang puy-an inigkahuman sa ilang kasal. Gipahigayon na ang blessing sa ilang balay niadtong Enero 1.
Naglikay
Nakahukom si Miss Universe 205 Pia Wurtzbach nga dili motikang sa kasal nila ni Pauleen Luna ug Vic Sotto aron dili siya mokawat og atensyon. Si Pia maoy bestfriend ni Pauleen.
Renz ganahan ni Kris
Kanunay nga magpadala og regalo si Renz Fernandez ngadto kang Kris Bernal. Gikatahong duna’y gusto si Renz ngadto kang Kris. Bukas hinuon si Kris nga makagusto puhon kang Renz gumikan kay nakita niya ang kabuotan niini.
Suklan ni Kris
Gibutyag ni Kris Aquino nga naanad na siya sa pagsukol sa iyang bashers sa social media. Usa sa makapungot kaniya kung damayon sa pag-atake ang iyang mga anak busa iya gyud kini suklan.
Dear Uge
Karong February 14 ang pilot airing sa programa ni Eugene Dominggo nga Dear Uge sa GMA-7. Hatagan og pagtagad ni Eugene ang mga suwat gikan sa viewers.
Giplastada ang uyab
Gipasigarbo pag-ayo ni Kobe Paras ang iyang model nga girlfriend nga si Gabrielle Current. Nagsagunson ang pag-post ni Kobe og mga hulagway nila sa iyang uyab sa Instagram. Sakop ang iyang uyab sa LA Models.
Giatngan sa fans
Giatngan na sa fans nila ni Sarah Geronimo ug John Lloyd Cruz kung madayon ba o dili ang subli nila nga panagpares sa pelikula karong tuiga. Katapusang nag-uban ang duha sa pelikulang It Takes A Man and A Woman.
Ethel nanimalos
Wala makapugong si Ethel Booba sa iyang kapungot sa tawong nagsunog sa hulagway ni Miss Pia Wurtzbach didto sa Colombia busa nihimo pud siya og kaugalingong version niini.
Gi-post ni Ethel ang maong hulagway ug duna’y caption: "Kalma lang guys. Ako bahala. Babawi tayo sa sunugan ng effigy. Charot!"
Kahinumduman nga nahimong trending sa miaging adlaw ang video nga gi-upload sa Facebook user nga Colombian nga si Noider Almanza Barraza kinsa nisunog sa cartoon nga istatuwa ni Pia.
Nangayo hinuon og pasaylo si Barraza sa iyang gibuhat ug gitataw niini nga dili niya intensyon nga pasakitan ang mga Pinoy.
Matud pa niya nga kabahin na sa ilang tradisyon ang pagsunog og mga butang ug uban pa nga duna’y kalabotan sa nangagi nga mga isyu o kontrobersya aron sugaton ang malinawong bag-ong tuig,
Kahinumduman nga gipikhan siya og maayo sa netizens busa todo gyud ang pagpangayo niya og pasaylo.
MMFF mikita na og P737M
Miabot na ngadto sa P737 million ang kita sa tanang entries sa 41st Metro Manila Film Festival (MMFF) sulod lang sa walo pa ka adlaw nga pagpasalida niini.
Gianunsyo kini sa official Facebook account sa MMFF executive committee ug nihatag usab kini og update sa kasamtangang top 4 sa takilya.
Wala gidetalye ang kita matag pelikula ug ang top 4 naglangkob sa "My Bebe Love," 'Beauty and the Bestie," "Haunted Mansion," ug "Walang Forever." Ang MMFF executive committee mohatag og partikular nga box office figures karong January 6.
Wedding proposal mataud-taoran pa
Gitataw sa boyfriend ni Pokwang nga si Lee O'Brian nga dili engagement ring ang giregalo niya sa komedyanteng aktres niadtong Pasko.
Suma pa ni Lee nga maabot ra ang saktong panahon alang sa wedding proposal.
Sa pagka-karon, ilaha una nga gi-enjoy ang ilang istado isip manag-uyab.
Nasayran nga malipayong gisaulog ni Lee ang Pasko dinhi sa Pilipinas uban kang Pokwang ug ang pamilya niini.
Bangs ug Lloyd engaged na!
Engaged na si Bangs Garcia sa iyang half-British boyfriend nga si Lloyd Birchmore, kini nahibaw-an human ni-post sa Instagram ang higala sa aktres nga si Marlann Flores.
Sa maong video clip, nangayo si Lloyd ug pagtugot kang Bangs sa pagsulod na sa kalibutan sa kaminyoon. Gipakita usab sa maong video ang engagement ring. Aduna kini caption : "Omg I'm so happy for my best friend Val! I wish you all the best!"
Kasamtangang nibakasyon ang duha sa Boracay uban sa tagsa-tagsa nila nga pamilya.
Nipadangat og mensahe si Bangs alang sa iyang boyfriend : "I am so happy we are here in our sweet horizon once again and we will always keep on coming back here as much as we can. You make me the happiest baby ko."