Paolo nayayay

CEBU, Philippines – Gidala si  Paolo Ballesteros sa tambalanan sa miaging adlaw gumikan sa dehydration ug hilanat.  Nagsagunson karong panahona ang trabaho ni Paolo ug kanunay siya nga magpa-init sa adlaw gumikan sa  Juan For All, All For Juan segment sa Eat Bulaga.

Andam magpakasal

Mitungtong na og lima ka tuig ang relasyon ni Karla Estrada ngadto sa iyang non-showbiz boyfriend nga si Mark Yatco. Giangkon ni Karla nga nahisgutan na nila ang pagpakasal apan dili pa nila matino kung kanus-a kini mahitabo.

Lig-on ang direktor

Si Direk Mac Alejandre maoy mohupot sa TV remake sa Ang Panday sa TV5. Naghinamhinam na ang bida niini nga si  Richard Gutierrez .

Aljur mihimakak

Hugtanong gihimakak ni Aljur Abrenica ang taho nga matud pa nga nag-uban sila ni Louise delos Reyes og  hotel room atol sa shooting sa pelikula nila nga  Hermano Puli.“Magkasama kami ng tent sa dressing room, pero hindi naman sa hotel,”  tsika pa ni Aljur.

AlDub concert giplanohan

Niulbo karon ang taho nga matud pa nagplano ang GMA -7 ug APT Entertainment nga mo-produce og concert nila ni Alden Richards ug Maine Mendoza.  Nasayran nga sikat na kaayo ang duha busa gipanglantawan nga molampos gyud ang maong concert.

Makasakay na gyud sa float

Nagpanikad na si John Lloyd Cruz sa  parade of stars sa Metro Manila Film Festival (MMFF) 2015 . Mao kini ang labing una nga higayon nga makatungtong si Lloydie sa float sa nahisgutang film festival. Si Lloydie maoy bida sa pelikulang Honor Thy Father.

Giluwas ni Gabby

Nakadayeg kang Gabby Concepcion ang mga  production staff sa seryeng Because of You  gumikan kay gipadayon gihapon niini ang taping  sa miaging adlaw bisan naglain ang tiyan sa aktor niadtong higayona.  Dili gusto si Gabby nga mawad-an og trabaho ang mga staff gumikan kay matag-taping ang basehan sa ilang suweldo.

Gerald na-link sa modelo

Natsismis  karon ang pangalan ini Gerald Anderson ngadto sa modelo nga si  Lily Maymac. Ang duha nakit-an nga nanuroy sa usa ka resto bar didto sa kaulohan.  Tak-om pa ang pangalan ni Gerald sa maong taho.

Double platinum

Nakahilak si Alden Richards sa dihang gidawat niya ang  double platinum award alang sa iyang album nga  Wish I May. Gianunsyo kini atol sa Sunday Pinasaya kagahapon sa hapon. Gitunol sa Philippine Association of Recording Industry (PARI)  ang maong award ngadto kang Alden atol sa Chef Boy Next Door segment sa maong programa.“Alam niyo kahit ang dami kong ginagawa sa tapings and sobrang napapagod ako with a lot of schedules, alam niyo yung mga ganitong simpleng bagay, it means a lot.Thank you sa lahat ng sumusuporta!,” matud pa ni Alden.

Pia nangayo og tabang sa AlDub Nation

Nangayo og tabang  ang pambato sa Pilipinas  sa Miss Universe nga si  Pia Wurtzbach ngadto sa fands nila ni Alden Richards ug Maine Mendoza.

Partikular nga tabang nga iyang gipangayo mao ang pagbotar kaniya online pinaagi  sa  social media judging system sa Miss Universe 2015.

Nag-post og hulagway si  Pia sa Instagram niadtong Sabado ug  nag-pabebe wave kini  uban sa iyang  mensahe alang sa  AlDub Nation.

Itunong gyud sa saktong oras ang bag-ong  social media judging system sa Miss Universe karong tuiga.  Makabotar  lang ang netizens samtang nagrampa ang kandidata sa entablado.

Nasayran nga delayed telecast ang matan-awan sa  ABS-CBN busa gidasig ni  Pia ang iyang supporters ug  AlDub Nation motan-aw pinaagi sa  cable o ba kaha  online streaming.

Dako matud pa og matabang  ang  AlDub Nation aron makasulod siya sa  Top 5 sa nahisgutang indigay.

Nailhan ang AlDub fans   nga matud pa kusog  mopa-trend sa  social media ug usa sa ebidensya niini mao ang record-breaking nga  41 million tweets sa Tamang Panahon concert sa Eat Bulaga.

Nagbayad og dakong buhis

Ang  boxing champ  nga si Manny Pacquiao maoy  second highest taxpayer sa  Pilipinas sa tuig 2014. Base sa listahan  nga gipagawas sa website sa Bureau of Internal Revenue, si Pacman nakahatag og buhis nga P210,305,927. Sa  100 top tax payers  sa nasud, pipila niini mga artista.

Samtang si Kris Aquino nahimutang sa ikaunom  nga puwesto human siya nakabayad og P54,530,635 nga buhis.

Nakabayad usab si Sharon Cuneta og buhis nga  P49,117,122, ug nahimutang siya sa ika-13 nga puwesto.

Nakatungtong sa ika-22 nga puwesto ang award-winning actor  nga si John Lloyd Cruz kinsa nakahatag og  buhis nga P37,701,343.

Ang Eat Bulaga! host nga si  Vic Sotto nakabayad og buhis  nga  P27,001,073, busa nahimutang siya sa ika-45  listahan sa  highest taxpayer sa nasud.

Moabot usab sa P26,423,395 nga buhis ang nabayad ni Piolo Pascual nga nakapahimutang kaniya sa  ika-48 nga puwesto.

Samtang ang aktres nga si Coco Martin nakabayad og buhis nga  P22,017,644, nga maoy nakapahimutang kaniya sa ika- 66 nga puwesto sa highest taxpayer.

Nalandig sa ika-27 nga puwesto ang Pop Princess  nga si Sarah Geronimo kinsa nakabayad og buhis nga  P21,471,618 .

Ika-90 nga rank maoy nahimutangan sa pangalan ni Derek Ramsay kinsa nakahatag og buhis nga P20,022,099.

Ang Kapuso Primetime Queen  nga si Marian Rivera nahimutang sa ika- 98  nga puwesto ug nakabayad kini og buhis nga  P19,000,949.