Kahit may sakit, Gabby Concepcion tinapos ang taping

MANILA, Philippines – Ibang klase talaga ang dedikasyon sa trabaho ng Kapusong si Gabby Concepcion. Kahit pa may sakit kahapon dahil sa pagsusuka at pananakit ng tiyan ay hindi ito nagdalawang-isip na ituloy ang taping para sa serye niyang Because of You. Napaka-professional talaga ng actor na hindi ininda ang kanyang karamdaman at tinapos ang kanyang taping. Kaya naman hangang-hanga sa kanya ang kan­yang mga co-stars sa serye pati na rin ang production dahil hindi ito nagreklamo.

Hindi maikakailang inspirado talaga si Gabby na magtrabaho dahil sa tagumpay ng kanyang kauna-unahang serye sa GMA 7, ang Because of You. Masayang-masaya siya dahil sa nag-uumapaw na suporta at papuri ng manonood sa programa lalo na sa tambalan nila ni Carla Abellana na kinahuhumalingan ngayon ng viewers pati na rin ng netizens. Kaya naman tutok siya na lalo pang pagbutihin ang kanyang trabaho para lalo niyang mapasaya at mapakilig ang manonood gabi-gabi sa Because of You.