CEBU, Philippines – Ang tawo dili perpekto, aduna gyud kini mantsa partikular na sa mga sala nga nahimo niini.
Bisan pa man niini, andam gihapon modawat kaniya ang Ginoo bisan paman sa kalit nimo nga pagbiya kaniya.
Tipik lang kini sa mensahe sa ilado nga book author ug preacher nga si Bro. Bo Sanchez sa dihang nahinabi kini sa Banat In atol sa bag-ohay lang nga Kerygma Conference nga gipahigayon diha sa Waterfront Hotel-Cebu City .
“Kung meron kang nagawang mali, mapapatawad ka ng Diyos, lumapit ka lang sa kanya,” suma pa ni Bro. Bo.
Ang maong engrande nga kalihukan nga may tema nga “Coming Home” gitambongan sa kapin sa 4,000 ka mga tawo.
Gisaysay niya nga ang tinud-anay nga panimalay gipuy-an sa nagkahiusang pamilya. Ang panimalay malinawon kung kanunay ka nangayo og giya sa Ginoo.
Gawas kang Bro. Bo, nihatag usab og mabula-wanong pulong sila si Bro. Jon Escoto, Obet Cabrillas, Arun Gogna, ug Alvin Barcelona.
Paggamit sa imong Christmas bonus
Mosulod na gani ta karong panahona ug sa nagkadaiyang establisamento ilabi na sa mga shopping mall, madunggan gyud nato kanuna’y ang mga pasko-hanong awit.
Mitungtong na ang buwan sa Disyembre. Ang uban nagmaya og maayo kay nakadawat na sa ilang Christmas bonus samtang ang uban nagpaabot pa lang.
Puwes, ania ang tips nga namantala sa www. brighterlife.com kung unsay angayan nga buhaton sa madawat nimo nga Christmas bonus.
1.Pagahin alang sa imong kaugalingon. Importante kaayo nga hatagan pud nimo og reward ang imong kaugalingon human ka nagkugi sa imong trabaho. Tan-aw og sine, mobakasyon ba kaha sa nindot nga lugar, kanang dili lang kaayo mahal.
2. Pagtigom alang sa emerhensya. Paghipos og kuwarta ug dili kini gastohon sa dili kaayo importante nga mga butang. Sa panahon nga duna’y emerhensya nga mahitabo kanimo, dili ka magkapuliki og pangita og kuwarta.
3. Mahimong patubuon ang kuwarta. Aron mabulukon ang imong pagtigom, mahimo kang mo-invest aron maka-kuwarta ka. Ipaneguro lang gyud nga patok nga negosyo ang imong sudlan.
4. Ayaw kalimti ang imong utang. Pipila sa mga tawo ang magpatuyang lang og pamalit (shopping) kung makahupot na sa ilang Christmas bonus. Ayaw kalimti ang pagbayad sa nahibilin nimo nga mga utang.
5. Paambit sa grasyang nadawat. Gawas sa paggahin og budget sa mga importanteng butang, labing maayo pud nga mopaambit ka sa imong nadawat ngadto sa ubang tawo pinaagi sa paggama og charity work.