Kilig ra! “Stepher” in Camotes

CEBU, Philippines - Napuno sa sungog sila si Stephanie ug It’s Showtime’s Mr. Pastillas runner-up Topher kagahapon didto sa Baywalk sa San Francisco, Camotes samtang nagpahulagway.

Kini kay mga duha na ka semana ang nilabay, gitupo-tupo na silang duha sa ilang mga fans sa Twitter ug Facebook kay matud pa angayan kaayo silang tan-awon o pareson.

Kini human usab ang hulagway nila ni Topher ug Stephanie nag-trending sa nilabay nga bulan ug gibutangan og caption sa nahauna nga nagkanayon, “Ang bagong magandang Singer ng Cebu.”

Usa man gud sa mga guests si Topher sa album launching ni Stephanie dinhi sa Sugbo sa nilabay nga bulan hinungdan nga nagkaila gyud og maayo ang duruha ug nakapahulagway.

Kagahapon didto sa Camotes sila si Stephanie ug Topher kauban usab sila si Mr. Pastillas Richard Parojinog, Closet Dolls, Power Trio, ug world-class Cebuana Diva Anna Fegi Brown alang sa ilang show didto sa lungsod sa Tudela.

Ugma, guest usab si Topher sa ‘Handog Pasalamat” show ni Stephanie ug sa M. Talents and Promotions alang sa media ug sa tanan nga nisuporta sa album sa nahisgutan.

Ug tuod man, human na-upload kining maong mga hulagway sa ilang paglaag didto sa Camotes kagahapon daghan na sab ang nikomentaryo nga angayan o pareson gayud silang duruha.

Gani may mga fans na sila nga nagtawag sa ilang loveteam isip Stephers.

Hinuon, walay babag kun madutlan gyud silang duha sa ngadto ngadto gumikan sa mga sungog-sungog sanglit managsama sila nga single.