It’s the feeling

CEBU, Philippines – Sa sige nako’g balik balik sa Basilica nag-abot na gyud mi sa akong prayer warrior adtong Huwebes. Diha pay nagpa sinug niya, busa nipadaplin usa ko. Pagkahuman, nihagawhaw siya nako nga ipakilatis dili ba fake ang P500 bill nga gibayad sa babaye nga gwapa. Nakasabot ang babaye busa nilenggua siya nga dili fake iyang kwarta kay gikan pa gyud to sa bangko. Nangatawa ming tulo.

 Giganahan ra sab ko sa babaye kay wala ra siya nalain sa pagduhaduha ni manang. Nahimuot sab ko ni manang kay mabinantayon gyud siya. Sa akong hunahuna, husto ra sab si manang nga naniguro gyud siya kay pila ra gud sab baya ang halin o maginansya nila anang baligya nilang kandila. Lima ka buok gipalit sa babaye, kantidad og P50 busa gisuklian siya ni manang og P450. Sa ako sab nga hunahuna, nakaingon ko nga wala sab siguroy mangilad uy pinaagi sa pagbayad og fake nga kwarta. Madahan, sa Basilica pa gyud. Sa atubangan mismo ni Sr. Sto. Nino? Ug ako sab ang nitubag sa akong kaugalingon pinaagi sa pag-ingon nga mas maayo gyud nga maniguro lang, magmabinantayon ilabi na nga nagsingabot na ang Pasko, dili malikayan nga naa sab gyud mga mapahimuslanon, mupakatap og fake money.

Speaking of Pasko, nagchika mi ni manang dihang nilakaw na ang babaye. Nagtuo matud pa siya nga ni abroad ko kay wala na man gyud ko niya igkita sa Basilica. Ako siyang giingnan nga alas tres man gud ko kasagaran muadto sa Basilica. Remember my column last month katong nasakit ko kay nahikalimot na ko kang Sr. Sto. Nino? Di ba I promised nga mutekang gyud ko sa Basilica six times a week isip pasalamat nga iya ra pud ko nga gi-ayo sa akong balatian human ko niya gipahinumduman nga medyo nahilayo ug nahikalimot na ko niya. Ako gyud na nga gipaningkamotan pagtuman.

Unya nipaambit si manang nga nianang pagka gabii nag-istorya siya ug ang iyang apo. Nanghambog matud pa siya nga naa siyay suki nga muhatag gyud niya og pinaskohan. Dili mutuo iyang apo ug iya matud pa nga giingnan nga duha na ka tuig nga nakadawat siya og pinaskohan sa mao niyang suki. Ug nga kun ania lang gyud sa Cebu ang iyang suki nakasiguro gyud siya nga makadawat na sab siya og pinaskohan karong tuiga.

Nipa-hiyom ko nga naminaw niya. Ako man ang iyang gipasabot nga suki. Nagkatawa ang akong kasingkasing kay gamay ra gyud akong gitunol niya nga pinaskohan kun buot hunahunaon apan dako na kaayo niyang kalipay. Didto ko nakaingon nga maningkamot gyud ko nga makatunol na sab niya og pinaskohan  bahala’g pilay kantidad o bisan dili kaayo dako kay na-appreciate gyud niya. Sa samang higayon nakahunahuna sab ko nga dili gyud importante ang kantidad sa imong hinatag. Ang importante mao nga kinasingkasing nimo kining gigasa.  Labaw sa tanan, mas nindot gyud ang feeling nga ang imong hatagan mao kadtong walay igong kapasidad pagbawos nimo. Nindot nga palandungon nga dili nimo ig-unsa ang imong gitabangan o giregaluhan. Matam-is siya nga feeling.

Naa bitaw na sa Bibliya nga walay bili kun ang imo ra sab nga higugmaon mao ang imong higala o kadugo. Mas makahuluganon nga bubuan nimo sa imong paghigugma kadtong mga tawo nga nakasakit nimo, silang mga naghandum nga maalaot ka. In short, love your enemies! Pakpak!

Eskina kusina

Talong sisig

Kung mohisgot na gani og sisig, musantop sa hunahuna sa tawo mao nga hiniwa gyud kini nga karne o tambok sa baboy. Apan, niining higayona, magpalahi ta. Atong suwayan ang gitawag nga talong sisig aron sigurado nga mogana gyud ang imong kaon.

Atong ipaambit ang recipe sa talong sisig nga gikan sa www. melyskitchen.blogspot.com.

Mga sagol:

250 grams talong

100 grams pork liver

25 grams bell pepper

1 sibuyas bombay

3 lusak nga ahos

3 kutsara  nga  lemon o calamansi juice

5  kutsara nga soy sauce

1/4 tasa nga tubig

1 itlog

Pamaagi:

1. Hiwa-hiwaon ang  talong, pork  liver, bombay, ug bell pepper .

2. Gisahon ang ahos ug bombay ug  idugang dayon ang pork  liver ug bell pepper .

3. Ibutang ang talong, soy sauce ug lemon juice.

4.  Inig kaluto, ibutang dayon sa babaw nga bahin ang unod sa itlog.  (Anden Miles)